يتاليانىڭ جاڭارتىلعان جول قوزعالىسى ەرەجەسى جولدان وتكەندە ۇيالى تەلەفونعا قاراپ جۇرەتىن جاياۋ جۇرگىنشىلەرگە باعىتتالعان. بۇل تۋرالى infohub.kz حابارلايدى.
قۇجاتتىڭ جوباسىنداعى بۇل بۇزۋشىلىق ءۇشىن ايىپپۇل 75 ەۋرودان باستالادى. جاڭا ەرەجە قازان ايىنىڭ ورتاسىنا قاراي بەكىتىلۋى كۇتىلۋدە. ماقسات – جۇرگىزۋشىنىڭ تەلەفونعا الاڭداعان جاياۋ جۇرگىنشىگە ۋاقىتىندا ارەكەت ەتە الماي قالۋ جاعدايلارىن ازايتۋ، بۇل كەيدە اۋىر جول اپاتىنا اكەلۋى مۇمكىن.
بۇل شارا يتاليا سوتتارىنىڭ ابايسىز جاياۋ جۇرگىنشىلەردى جول اپاتىنا كىنالى دەپ تانىعان بىرنەشە شەشىمىنەن كەيىن قابىلدانىپ وتىر. تىيىم سالۋ تىزىمىنە نوۋتبۋك، پلانشەت جانە سيفرلىق كامەرا سياقتى باسقا ەلەكتروندى قۇرىلعىلار دا كىرەدى. الايدا جاياۋ جۇرگىنشىلەر جولدان وتكەندە قولسىز سويلەسۋگە بولادى، ال توتەنشە جاعدايدا تەلەفوندى پايدالانۋعا رۇقسات ەتىلەدى. يتاليا باسپاسوزىندە جاريالانعان جاڭارتىلعان ەرەجە ۇزىندىلەرىنە سايكەس، قۇلاققاپ تاعۋعا دا رۇقسات، ءبىراق ەكى قۇلاقتىڭ دا دىبىستى جاقسى ەستيتىنى شارت.
بۇل شارا تروتۋارمەن كەلە جاتقان جاياۋ جۇرگىنشىلەرگە قولدانىلمايدى. جوبادا سونداي-اق جولدان وتپەس بۇرىن جاياۋ جۇرگىنشى جاقىنداپ كەلە جاتقان كولىك جۇرگىزۋشىسىنىڭ ونى كورگەنىنە جانە توقتاعىسى كەلەتىنىنە كوز جەتكىزۋى كەرەكتىگى ايتىلعان. سونىمەن قاتار، جاياۋ جۇرگىنشى جولدىڭ ارعى بەتىنە ءوتۋ كەزىندە ەكىۇشتىلىق تانىتپاۋى ءتيىس.
يتاليا – الاڭداپ جۇرۋگە قارسى شارا قولدانعان العاشقى ەل ەمەس. 2018 جىلى ليتۆادا جولدان وتكەندە ۇيالى تەلەفوندى پايدالانعانى نەمەسە باسقا دا الاڭداتاتىن ارەكەتتەر جاساعانى ءۇشىن جاياۋ جۇرگىنشىلەرگە ايىپپۇل سالىنعان بولاتىن. 2017 جىلى گونولۋلۋ الەمدە وسىنداي ەرەجەلەردى ەنگىزگەن العاشقى قالا بولسا، 2020 جىلى جاپونيانىڭ ياماتو قالاسى دا وسىعان ۇقساس شارالاردى قابىلدادى.
يتاليانىڭ جاڭارتىلعان جول قوزعالىسى ەرەجەسىندە كولىك جۇرگىزۋ كەزىندە تەلەفوندى پايدالانعانى ءۇشىن قاتاڭ جازا قاراستىرىلعان: قايتالاپ بۇزعاندارعا 2 588 ەۋروعا دەيىن ايىپپۇل سالىنىپ، جۇرگىزۋشى كۋالىگى ءبىر ايدان ءۇش ايعا دەيىن توقتاتىلادى. سونداي-اق، 85 جاستان اسقان جۇرگىزۋشىلەرگە شەكتەۋلەر ەنگىزۋ جوسپارلانعان بولاتىن: ولار ۇيىنەن 100 كم راديۋستا عانا جۇرە الادى جانە تاس جولداردا جۇرۋگە تىيىم سالىنادى. ءبىراق قوعامنىڭ نارازىلىعىنان كەيىن كولىك مينيسترلىگى بۇل شارانىڭ جوبادان بۇرىن الىنىپ تاستالعانىن جەكسەنبىدە حابارلادى.