يزرايلدە سوت نەگيەۆ شولىندەگى «كسيوت» تۇرمەسىن كۇزەتۋ ءۇشىن قولتىراۋىنداردى پايدالانۋ جوباسىن ۋاقىتشا توقتاتتى. بۇل تۇرمەدە تەرروريزمگە قاتىستى ىستەر بويىنشا ايىپتالعان نەمەسە سوتتالعان پالەستينالىقتار ۇستالادى، دەپ حابارلايدى infohub.kz سايتى.
بۇل باستامانى ۇلتتىق قاۋىپسىزدىك ءمينيسترى يتامار بەن-گۆير ۇسىنعان. ونىڭ جوسپارى بويىنشا تۇرمەنىڭ ءبىر بولىگىنىڭ اينالاسىنا تەرەڭ ورلار قازىلىپ، ولارعا قولتىراۋىندار ورنالاستىرىلۋى ءتيىس بولعان. جىرتقىشتار قوسىمشا قاۋىپسىزدىك شاراسى رەتىندە تۇتقىنداردىڭ قاشۋىنا جول بەرمەۋى كۇتىلگەن.
جوباعا Let The Animals Live جانۋارلاردى قورعاۋ ۇيىمى قارسى شىقتى. ونىڭ وكىلدەرى قولتىراۋىنداردى مۇنداي ماقساتتا پايدالانۋ زاڭسىز جانە جانۋارلارعا دا، قورشاعان ورتاعا دا زيان تيگىزۋى مۇمكىن ەكەنىن مالىمدەدى.
يەرۋساليم وكرۋگتىك سوتى جانۋارلاردى قورعاۋشىلاردىڭ تالابىن قولداپ، جوبانى ۋاقىتشا توقتاتتى. سوت سونداي-اق ۇكىمەت ءوز ۇستانىمىن بىلدىرمەيىنشە، بيلىككە ەشقانداي ارەكەت جاساۋعا تىيىم سالدى. بۇل تامىز ايىنىڭ ورتاسىنا قاراي بولادى دەپ كۇتىلۋدە.
يزرايل باق-تىڭ مالىمەتىنشە، جوبانى ىسكە قوسۋعا دايىندىق ءقازىردىڭ وزىندە باستالعان. تۇرمە اينالاسىندا ترانشەيالار قازىلا باستاعان، ال پيلوتتىق جوباعا شامامەن 21 ميلليون شەكەل (شامامەن 3،25 ميلليارد تەڭگە) بولىنگەن.
بەن-گۆيردىڭ ءوزى سوت شەشىمىن قاتتى سىنعا الدى. ونىڭ ايتۋىنشا، سوت جۇيەسى «تەرروريستەر جاعىندا» جانە ەل قاۋىپسىزدىگىن قامتاماسىز ەتۋ شارالارىن قابىلداۋعا كەدەرگى كەلتىرۋدە.
بۇعان دەيىن «كۋرسيۆ» اقتوبە تۇرعىنى قازاقستان سىم-نە 24 جاستاعى ۇلىنا كومەك سۇراپ جۇگىنگەنىن جازعان. ول ەكى جىلعا جۋىق ۋاقىتتان بەرى گرەكيا تۇرمەسىندە وتىر. ايەلدىڭ ايتۋىنشا، راشيد كاديروۆ ميگرانتتاردى زاڭسىز تاسىمالداعانى ءۇشىن 125 جىلعا باس بوستاندىعىنان ايىرىلعان.