ءيزرايلدىڭ قوعامدىق قاۋىپسىزدىك ءمينيسترى يتامار بەن-گۆير تۇرمە پەريمەترىن كۇزەتۋ ءۇشىن ءنىل قولتىراۋىندارىن پايدالانۋعا رۇقسات الدى، دەپ حابارلايدى infohub.kz Jerusalem Post گازەتىنە سىلتەمە جاساپ.
2025 جىلى-اق راديكالدى جانە انتيپالەستينالىق كوزقاراستارىمەن تانىلعان وڭشىل مينيستر نەگيەۆ شولىندەگى كەتسيوت قاتاڭ رەجيمدى تۇرمەسىن ءنىل قولتىراۋىندارىمەن قورشاۋدى نيەت ەتكەنىن مالىمدەگەن بولاتىن. بۇل مەكەمەدە نەگىزىنەن پالەستينالىق تۇتقىندار مەن عازاداعى سوعىس كەزىندە تۇتقىندالعان بەيبىت تۇرعىندار ۇستالادى.
باستامانىڭ الدىنداعى باستى كەدەرگى ءنىل قولتىراۋىنىنىڭ قورعاۋ مارتەبەسى بولدى. الايدا وسى اپتادا ءيزرايلدىڭ قورشاعان ورتانى قورعاۋ ءمينيسترى وزگەرىستەر ەنگىزىپ، باۋىرىمەن جورعالاۋشىنى «فەرمادا وسىرىلگەن جابايى جانۋار» ساناتىنا اۋىستىردى. بۇل قاۋىپسىزدىك ورگاندارىنا تۇرمەنىڭ سىرتقى پەريمەترىن كۇزەتۋ ءۇشىن قولتىراۋىنداردى پايدالانۋعا رۇقسات الۋعا مۇمكىندىك بەردى.
جوبانىڭ ناقتى مەرزىمدەرى ازىرگە جاريالانبادى.
سونىمەن قاتار ءيزرايلدىڭ تابيعات جانە ساياباقتاردى قورعاۋ باسقارماسى بۇل باستاماعا قارسى شىقتى. ۆەدومستۆو ءقاۋىپتى جىرتقىشتار تەك ءبىلىم بەرۋ جانە عىلىمي ماقساتتاردا عانا ۇستالۋى مۇمكىن ەكەنىن مالىمدەدى. شەنەۋنىكتەر تۇرمە ماڭىندا قولتىراۋىنداردى وسىرۋگە بايلانىستى تاۋەكەلدەر تۋرالى دا ەسكەرتتى: ولاردىڭ ايتۋىنشا، بۇرىن قولعا ۇيرەتىلگەن باۋىرىمەن جورعالاۋشىلار قاشىپ كەتىپ، بىرنەشە رەت ءقاۋىپتى جاعدايلار تۋعىزعان، ونىڭ ىشىندە ولىممەن اياقتالعان وقيعالار دا بولعان.