InfoHub Logo

ەرتەدە ورمان اراسىندا ءبىر جالعىز كىسى تۇرىپتى. بۇل كىسىدەن اڭ مەن قۇستار قورىقپاي، ادامشا سويلەسىپ جۇرەدى ەكەن. ءبىر كۇنى الگى كىسى تالدىڭ تۇبىندە جاتقاندا، بارلىق قۇستار جيىلىپ، سول جەرگە تۇنەمەك بولىپتى. اڭ مەن قۇستار ءوزارا اڭگىمەلەسىپ:

         — وسى دۇنيەدە جاماندىق نە سەبەپتەن بولادى؟ – دەپ بىرىنەن-بىرى سۇرايدى. سوندا قارعا ايتىپتى:

         — دۇنيەدەگى جاماندىق اشتىقتان بولادى، جۇرەگىڭ قارايعان كەزدە، نە بولسا سوعان ۇرىناسىڭ، ەشكىمدى تىڭدامايسىڭ. وسى اشارشىلىقتان ءبىزدىڭ قانشا جاقىن تۋىسىمىز ءولدى. سوندىقتان اش بولماۋدىڭ قامىن ويلاۋ كەرەك.

         كوگەرشىن ايتىپتى:

         —مەنىڭ ويلاۋىمشا، جامانشىلىق اشتىقتان ەمەس. سۇيىسپەنشىلىكتەن بولادى. ەگەردە ءبىز جالعىز بولساق، ءبىزدىڭ جۇمىسىمىز از بولار ەدى. ءبىز ەكەۋ-ەكەۋدەن تۇرامىز. ءوزىڭنىڭ جان جولداسىڭدى جاقسى كورگەن سوڭ، ساعان تىنىشتىق جوق. ونىڭ تاماعىن توق، كويلەگىن كوك ەتۋدى ويلايسىڭ. جانە دە ول ءبىر جاققا ۇشىپ كەتسە، امان-ەسەن كەلگەنشە، تيىشتىعىڭ كەتىپ، قايعى جەپ بولاسىڭ. كەلمەي قالسا، ىزدەيمىن دەپ، ءوزىڭ ءبىر اپاتقا ۇشىراپ ولەسىڭ. سوندىقتان جامانشىلىقتىڭ ءبارى وسى سۇيىسپەنشىلىكتەن.

         جىلان ايتىپتى:

         — مەنىڭشە، جاماندىق ىزاقورلىقتان بولادى. ەگەر دە ءبىز تاتۋ تۇرساق، ىزالانباس ەدىك. سوندا بىزگە ءبارى دە جاقسى كورىنەر ەدى. ەگەر دە ءبىر نارسە كوڭىلدەگىدەي بولماسا، قاتتى اشۋلاناسىڭ. ەشكىمدى اياماي، بىرەۋدى شاقسام ەكەن دەپ جورعالاي بەرەسىڭ. بىرەۋدى شاققان سوڭ، ءوزىڭدى ولتىرەدى. مىنە، جاماندىق ىزاقورلىقتان بولادى.

         بۇعى ايتىپتى:

         — مەنىڭشە، دۇنيەدەگى جاماندىق قورقاقتىقتان بولادى. ەگەر دە ءبىز ەش نارسەدەن قورىقپايتىن بولساق، ءبارى دە جاقسى بولار ەدى. مەن جۇيرىكپىن، كۇشىم كوپ، كىشكەنتاي اڭداردى مۇيىزىممەن ءسۇزىپ قۇلاتامىن، ۇلكەن اڭنان قاشىپ قۇتىلامىن. ءبىراق اعاشتىڭ بۇتاعى سىبدىرلاسا، جاپىراعى سۋىلداسا، قورىققانىڭنان ەسىڭ كەتىپ، قاشا باستايسىڭ. قاشىپ كەلە جاتىپ، جاردان قۇلاپ ولەسىڭ، يا يتكە جەم بولاسىڭ. سوندىقتان قورىقپاۋ كەرەك، باتىر بولۋ كەرەك.

         سوندا ولاردىڭ باياعى اڭگىمەسىن تىڭداپ جاتقان كىسى:

         — سىزدەر ءبارىڭىز دە جاماندىقتىڭ نە سەبەپتەن بولاتىنىن دۇرىس ايتتىڭىزدار. ءبىز، ادام بالاسى، ونى جاقسى بىلەمىز، نەگە دەسەڭىزدەر، ءبىز جاماندىقتى دا، جاقسىلىقتى دا كوپ ىستەيمىز. اشتىق، سۇيىسپەنشىلىك، ىزاقورلىق، قورقاقتىق–ءبارى دە ءجان-تانىمىزدى ساقتاۋ ءۇشىن كەرەك. ءبىراق ءبىز تانىمىزبەن تىرشىلىك ەتپەيمىز، كوبىنەسە جانىمىزبەن تىرشىلىك ەتەمىز. ەگەر دە ءبىز بارىنەن بۇرىن تانىمىزگە قىزمەت قىلماي، جان كۇيىنە قىزمەت ەتۋدى تىلەسەك، وندا ءبىز امان بولار ەدىك، – دەپتى.

---