بۇگىن مەتروپوليتەننىڭ المالى بەكەتىندە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇيىمداستىرۋىمەن قولونەر كورمەسى قالا تۇرعىندارىنا ۇسىنىلدى.
شارا بارىسىندا ونەر اكادەمياسىنىڭ تاربيە ءىسى جونىندەگى پرورەكتورى ەرگوبەك شىڭعىس قۇلبەك ۇلى: «بۇگىنگى شارا ەلباسىنىڭ «بولاشاققا باعدار: رۋحاني جاڭعىرۋ» جانە ءتورتىنشى وندىرىستىك رەۆوليۋسيالىق جاعدايىنداعى قازاقستاننىڭ وركەندەۋىنە باعىتتالعان. ەلباسىمىز اتالعان تاقىرىپتى قوزعاي وتىرىپ، ەڭ نەگىزگى ەرەكشەلىك رەتىندە ۇلتتىق ونەرگە باسا نازار اۋدارعان بولاتىن. سوندىقتان دا شىعارماشىلىق كورمە ەلباسى جولداۋىن قاراپايىم ەمەس، بارشا ادامزاتتى بىرىكتىرەتىن ورتاق، ءارى قۋاتتى «ونەر تىلىمەن» جەتكىزبەك. قوعامدى ەتيكالىق، ەستەتيكالىق تۇرعىدا بايىتۋ – ۇلتتىق ونەر اكادەمياسىنىڭ باستى ماقساتى. بۇل ميسسيانى اكادەميا ۇجىمى، تالانتتارى ءوز دەڭگەيىندە اتقارىپ كەلەدى»، – دەدى.
كورمەگە ستۋدەنتتەرمەن قاتار، ق ر كەسكىندەمە جانە ءمۇسىن ونەرىنىڭ مايتالماندارى ب.دوسجانوۆ، ج.قايرامبايەۆ، ق.وسپانوۆ، م.جۇنىسبايەۆ، ب.تۇرعىنباي، ب.ءبايدىلدا، س.تاينوۆ، ا.ابجانوۆا سىندى ونەر قايراتكەرلەرىنىڭ جۇمىستارى قويىلعان. قولونەر شەبەرلەرىنىڭ تۋىندىلارى ۇلتتىق قۇندىلىقتى، ءسالت-داستۇرىمىزدى دارىپتەپ تۇر. اسىرەسە، ب.ءبايدىلدانىڭ «باتىر باۋىرجان» موزايكاسى، ب.دوسجانوۆتىڭ الليۋمينيدەن جاسالعان «كەرۋەن»، ۇزاقباي اسىلاننىڭ «باقسى» ءمۇسىنى جانە داۋرەنبەك حالىق نازارىن اۋداردى.
شارانىڭ وتكىزىلۋىنە ۇلەس قوسقان الماتى مەتروپوليتەنىنىڭ ءباسپاسوز حاتشىسى يگور ساحار: «جىلدا مەترو بەكەتىندە 30-عا جۋىق ءتۇرلى كورنەكتى شارالار وتكىزىلىپ تۇرادى. ماسەلەن، بايقوڭىر بەكەتىندە كىتاپ كورمەسىنىڭ فەستيۆالى قولعا الىندى. ال بۇگىن ءبىز ت.جۇرگەنوۆ اتىنداعى ۇلتتىق ونەر اكادەمياسىنىڭ تۇلەكتەرىمەن بىرلەسە ۇلتتىق ونەرگە باعىتتالعان قولونەر كورمەسىن ۇيىمداستىرىپ وتىرمىز. وسى تەكتەس ءىس-شارالار جاستاردى پاتريوتتىق سەزىمگە ۇندەپ، ونەرگە دەگەن سۇيىسپەنشىلىكتى ارتتىراتىندىعىن» ايتتى.
كورمەدە قولونەر تۋىندىلارىنان بولەك، «الاتاۋ» ەتنوگرافيالىق ءانسامبىلى تۇركەشتىڭ «كوڭىل اشار»، نۇرعيسا تىلەنديەۆتىڭ «اتا تولعاۋى»، ءابدىمومىن جەلدىباەۆتىڭ «ەركە سىلقىم» سىندى كۇيلەرىن ورىنداپ، شارا مەرەكەلىك كونسەرتكە ۇلاستى.
اراي جۇماتاي،
ءال-فارابي اتىنداعى قازۇۋ،
جۋرناليستيكا فاكۋلتەتى، ءىى كۋرس