قازاقستان تۇرعىنى دجەننيفەر لوپەس كونسەرتىنە ساتىپ العان بيلەتىنىڭ تولىق قۇنىن سوت ارقىلى قايتارىپ الدى. ساتۋشى الدىمەن 30% (113 061 تەڭگە) ۇستاپ قالعان ەدى، ءبىراق اپەللياسيالىق سوت ساتۋشىنى 376 869 تەڭگەنى تولەۋگە مىندەتتەدى، دەپ حابارلايدى infohub.kz.
ادىلەتتىلىكتى قالپىنا كەلتىرۋگە پاۆلودار وبلىسى بويىنشا ساۋدا جانە تۇتىنۋشىلار قۇقىعىن قورعاۋ دەپارتامەنتىنىڭ ماماندارى كومەكتەستى.
ءىس ماتەريالدارى بويىنشا، بيلەت تۋريستىك اگەنتتىك ارقىلى ساتىپ الىنعان. الايدا تولەمنەن كەيىن ساتىپ الۋشىعا شارت تا، كاسسالىق چەك تە، بيلەتتىڭ ءوزى دە بەرىلمەگەن. كەيىن ول ساتىپ الۋدان باس تارتىپ، اقشانى قايتارۋدى تالاپ ەتكەن. ورىنداۋشى تەك ءبىر بولىگىن قايتارۋعا كەلىسىپ، 30% – 113 061 تەڭگەنى ۇستاپ قالعان.
العاشقى سوت ساتۋشىعا تەك ءبىر بولىگىن قايتارۋدى تاپسىرىپ، داۋدى تۋريستىك قىزمەتكە قاتىستى دەپ ساناعان. «ءبىرىنشى ساتىداعى سوتتا ورىنداۋشى تۋريستىك اگەنتتىك ارقىلى ساتىپ الىنعاندىقتان، داۋ تۋريستىك قىزمەت كورسەتۋ شەڭبەرىندە تۋىنداعانىن ايتىپ، «تۋريستىك قىزمەت تۋرالى» قازاقستان رەسپۋبليكاسى زاڭىن قولدانۋدى سۇرادى. سوت بۇل ۇستانىممەن كەلىسىپ، تالاپتى ءىشىنارا قاناعاتتاندىرىپ، تۇتىنۋشىنىڭ پايداسىنا 263 809 تەڭگە ءوندىرىپ، 113 060 تەڭگە ۇستالىپ قالعان سومانى وندىرۋدەن باس تارتتى»، – دەپ ءتۇسىندىردى دەپارتامەنتتەن.
الايدا اپەللياسيالىق ساتى تاراپتار اراسىندا تۋريستىك ونىمگە شارت جاسالماعانىن، تەك كونسەرتكە بيلەت ساتىپ الۋ تۋرالى كەلىسىم بولعانىن انىقتادى. «تاراپتاردىڭ قاتىناستارى «تۋريستىك قىزمەت تۋرالى» زاڭمەن ەمەس، ازاماتتىق كودەكستىڭ 33-تاراۋىنىڭ اقىلى قىزمەت كورسەتۋ ەرەجەلەرىمەن رەتتەلەدى»، – دەلىنگەن سوت شەشىمىندە.
سونىمەن قاتار، ورىنداۋشى 113 مىڭ تەڭگەدەن استام ۇستاۋعا نەگىز بولاتىن ناقتى شىعىندارىن قۇجاتپەن راستاي الماعان. «قىزمەت قۇنىنىڭ 30% ۇستاۋ شارتى تۇتىنۋشىنىڭ نازارىنا تولەم جاسالعاننان كەيىن عانا جەتكىزىلگەن، سوندىقتان ولار تاراپتاردىڭ كەلىسىمى دەپ سانالمايدى»، – دەپ اتاپ ءوتتى سوت.
ناتيجەسىندە اپەللياسيالىق القا ساتۋشىنى بيلەتتىڭ تولىق قۇنىن – 376 869 تەڭگەنى جانە سوت شىعىندارىن وتەۋگە مىندەتتەدى.
ساۋدا جانە تۇتىنۋشىلار قۇقىعىن قورعاۋ دەپارتامەنتى ساتىپ الۋشىعا بيلەتتى ساتىپ الۋ جانە قايتارۋ شارتتارى تۋرالى تولىق اقپاراتتى الدىن الا بەرۋ مىندەتىن ەسكە سالدى. ساتىپ الۋشىلارعا رەسمي بيلەت وپەراتورلارىنىڭ قىزمەتىن پايدالانۋعا، چەكتەردى، كۆيتانسيالاردى، ەلەكتروندى بيلەتتەر مەن حات-حابارلاردى ساقتاۋعا كەڭەس بەرەدى – ولار قۇقىقتى قورعاۋ كەزىندە قاجەت بولۋى مۇمكىن.
ەسكە سالايىق، دجەننيفەر لوپەس 2025 جىلدىڭ 1 تامىزىندا استانادا، ال 10 تامىزدا الماتىدا كونسەرت بەرگەن.