ايەلدىڭ جۇكتىلىك جانە بالا ەمىزۋ كەزىندە اللەرگەن ونىمدەردى تۇتىنۋى نارەستەنىڭ ءبىر جاسقا تولعانعا دەيىنگى تاعامدىق اللەرگيا ءقاۋپىن تومەندەتپەيدى. وسىنداي قورىتىندىعا ادەلايدا ۋنيۆەرسيتەتىنىڭ اۋستراليالىق عالىمدارى كەلدى. ولار انانىڭ راسيونىنا اللەرگەندەردى بەلسەندى قوسۋدىڭ بالالاردا تۋىلعانعا دەيىن جانە لاكتاسيا كەزەڭىندە ولارعا توزىمدىلىك قالىپتاستىرا الاتىنى تۋرالى بولجامدى تەكسەردى، دەپ حابارلايدى infohub.kz سايتى.
ءىرى PrEggNut كلينيكالىق زەرتتەۋىنىڭ ناتيجەلەرى The New England Journal of Medicine جۋرنالىندا جاريالاندى. بۇل تۋرالى News-Medical جازادى.
تاجىريبەگە وتباسىلارىندا بۇرىن استما نەمەسە ەكزەما سياقتى اللەرگيالىق اۋرۋلار تىركەلگەن 2137 جۇكتى ايەل قاتىستى. قاتىسۋشىلار ەكى توپقا ءبولىندى: ءبىرىنشىسى جۇكتىلىك جانە لاكتاسيانىڭ العاشقى 4 ايى ىشىندە اپتاسىنا كەمىندە 6 جۇمىرتقا مەن 60 جەرجاڭعاق جەدى، ال ەكىنشىسى ستاندارتتى ديەتا ۇستاندى — 3 جۇمىرتقا مەن 30 جاڭعاقتان اسپايدى.
بالالار 12 ايعا تولعاندا زەرتتەۋشىلەر تەرى سىنامالارى مەن اۋىز ارقىلى پروۆوكاسيالىق تەستتەر جۇرگىزدى. جۇمىرتقاعا نەمەسە جەرجاڭعاققا تاعامدىق اللەرگيا اللەرگەندى كوپ تۇتىنعان توپتاعى نارەستەلەردىڭ 7،8%-ىندا، ال باقىلاۋ توبىنداعى بالالاردىڭ 8،4%-ىندا دامىعانى انىقتالدى. بۇل ايىرماشىلىق ستاتيستيكالىق تۇرعىدان ەلەۋسىز بولىپ شىقتى.
زەرتتەۋ اۆتورلارى جۇكتىلىك جانە بالا ەمىزۋ كەزىندە انانىڭ راسيونىن وزگەرتۋ بالاداعى تاعامدىق اللەرگيانىڭ الدىن الۋعا كومەكتەسپەيدى دەگەن قورىتىندىعا كەلدى. سونىمەن قاتار عالىمدار بۇل ونىمدەردى نارەستەنىڭ وزىنە قوسىمشا تاعام رەتىندە التى اي شاماسىندا ۋاقتىلى ەنگىزۋ پروفيلاكتيكانىڭ ءتيىمدى جولى بولىپ قالا بەرەتىنىن اتاپ وتەدى.