ونەركاسىپ جانە قۇرىلىس ءمينيسترى ەرسايىن ناعاسپايەۆ ۇكىمەتتە وتكەن بريفينگتە ءبىرىڭعاي جيناقتاۋشى زەينەتاقى قورىنان زەينەتاقى جيناقتارىنىڭ ءبىر بولىگىن الۋدىڭ جەتكىلىكتىلىك شەگىن قايتا قاراۋعا تۇرعىن ءۇي نارىعىنىڭ رەاكسياسى تۋرالى ايتتى، دەپ حابارلايدى infohub.kz سايتى.
جۋرناليستەر مينيستردەن زەينەتاقى جيناقتارىن الۋدىڭ جەتكىلىكتىلىك شەگىنىڭ كوتەرىلۋى قازاقستاندىقتاردىڭ ساتىپ الۋ قابىلەتىنە اسەر ەتكەن-جەتپەگەنىن سۇرادى. «جوق»، — دەپ قىسقا جاۋاپ بەردى ول.
ونىڭ ايتۋىنشا، مينيسترلىك كوممەرسيالىق تۇرعىن ءۇي باعاسىن رەتتەمەيدى. «ەل بويىنشا كوممەرسيالىق تۇرعىن ءۇيدىڭ ءبىر شارشى مەترى شامامەن 617 مىڭ تەڭگە تۇرادى. الەۋمەتتىك تۇرعىن ءۇي باعاسىنا كەلسەك، مەملەكەتتىڭ ۇستانىمى انىق — ءبىز باعانى باقىلايمىز، ول وسپەيدى. مەن باعانىڭ ءوسۋى نەمەسە تومەندەۋى تۋرالى بولجام بەرمەيمىن، ءبىراق وعان ەشقانداي نەگىز جوق. ادەتتە جازدا سۇرانىس ارتادى، تۇرعىن ۇيگە دەگەن سۇرانىس ءارقاشان جوعارى»، — دەپ تۇيىندەدى ەرسايىن ناعاسپايەۆ.