اقش-تىڭ بۇرىنعى پرەزيدەنتى دجو بايدەن مەتاستازدى قۋىق استى بەزىنىڭ قاتەرلى ىسىگىنىڭ اگرەسسيۆتى تۇرىنە ەم قابىلداۋ سالدارىنان قاتتى السىرەگەن. سونىمەن بىرگە تەراپيا وڭ ناتيجە بەرىپ وتىر. بۇل تۋرالى ساياساتكەردىڭ اينالاسىنداعى دەرەككوزدەرگە سىلتەمە جاساعان The Washington Post باسىلىمى حابارلايدى، دەپ جازادى infohub.kz.
The Washington Post باسىلىمىنىڭ دەرەگىنشە، ءقازىر 83 جاستاعى بايدەننىڭ ءومىرى نەگىزىنەن مەديسينالىق پروسەدۋرالاردىڭ اينالاسىندا وتۋدە. اق ءۇيدىڭ بۇرىنعى باسشىسى وتباسى، جاقىن دوستارى جانە بۇرىنعى كومەكشىلەرىنىڭ ورتاسىندا ۋاقىت وتكىزىپ، قوعامدىق ءىس-شارالاردا سيرەك كورىنەدى.
گازەتتىڭ سۇحباتتاستارى ەمدەۋ ناتيجە بەرىپ جاتقان سياقتى ەكەنىن، الايدا اۋرۋدىڭ ءوزى مەن تەراپيانىڭ جاناما اسەرلەرى ەكس-پرەزيدەنتتىڭ فيزيكالىق كۇيىنە ايتارلىقتاي اسەر ەتكەنىن اتاپ وتەدى.
The Washington Post سونداي-اق دەنساۋلىق پروبلەمالارى بايدەننىڭ ءبىرقاتار جوسپارلارىنىڭ جۇزەگە اسۋىن قيىنداتقانىن جازادى. اتاپ ايتقاندا، دەلاۆەر شتاتىندا پرەزيدەنتتىك كىتاپحانا قۇرۋعا قارجى جيناۋ قيىنعا سوعۋدا، سونداي-اق 17 قاراشاعا جوسپارلانعان ونىڭ ەستەلىك كىتابىن قولداۋ تۋرى كۇمان تۋدىرۋدا.
بايدەننىڭ دياگنوزى تۋرالى بىلتىر مامىر ايىندا بەلگىلى بولدى. سوندا ونىڭ ءباسپاسوز قىزمەتى بۇرىنعى پرەزيدەنتتە سۇيەك تىنىنە مەتاستاز بەرگەن قۋىق استى بەزىنىڭ قاتەرلى ىسىگىنىڭ اگرەسسيۆتى ءتۇرى انىقتالعانىن حابارلادى.
كەيىن بايدەن ەلدەگى جەتەكشى مامانداردىڭ ءبىرىنىڭ باقىلاۋىمەن ەمدەۋگە كىرىسكەنىن جانە دارىگەرلەردەن قولايلى بولجام العانىن ايتتى. سونداي-اق وتكەن ايدا وعان تەرىدەگى قاتەرلى ىسىك جاسۋشالارىن الىپ تاستاۋ وپەراسياسى جاسالدى.
The Washington Post اتاپ وتكەندەي، مەتاستازدى قۋىق استى بەزىنىڭ قاتەرلى ىسىگى ەمدەلمەيتىن اۋرۋ بولىپ سانالادى، الايدا زاماناۋي تەراپيا ادىستەرى ونىڭ دامۋىن باسەڭدەتۋگە جانە پاسيەنتتەردىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى.