نيدەرلاند مامانى دجون ۆان ’ت سحيپ قازاقستان ۇلتتىق فۋتبول قۇراماسىنىڭ باس جاتتىقتىرۋشىسى بولىپ رەسمي تانىستىرىلدى، دەپ حابارلايدى infohub.kz.
قازاقستان فۋتبول فەدەراسياسى (قفف) 62 جاستاعى باپكەرمەن كەلىسىمگە قول جەتكىزدى. الداعى كۇندەرى ونىڭ كانديداتۋراسىن اتقارۋ كوميتەتى قاراستىرادى، ودان كەيىن تاراپتار كەلىسىمشارتقا قول قويادى.
قازاقستان قۇراماسىنىڭ باپكەرلىك شتابىنا كەلەسى ماماندار كىردى: اسسيستەنتتەر نۇربول جۇماسقالييەۆ پەن ەلدوس احمەتوۆ، قاقپاشىلار باپكەرى يۋري نوۆيكوۆ، دەنە شىنىقتىرۋ جاتتىقتىرۋشىسى ۆاديم بوروۆسكي جانە اناليتيك تيمۋر قۇسايىنوۆ.
ۆان ’ت سحيپ باپكەرلىك مانسابىن امستەردامدىق «اياكستىڭ» جۇيەسىندە باستادى، كەيىن ونى نەگىزگى كوماندا دەڭگەيىندە باسقاردى. ول سونداي-اق «تۆەنتە»، پەك «زۆوللە»، مەكسيكالىق «گۆادالاحارا» جانە اۋستراليالىق «مەلبۋرن سيتي» كلۋبتارىمەن جۇمىس ىستەدى. 2016 جىلى ول اۋستراليالىق كلۋبتى ۇلتتىق كۋبوكتا جەڭىسكە جەتكىزدى.
ۇلتتىق قۇرامالار دەڭگەيىندە نيدەرلاندتىق گرەكيا مەن ارمەنيا كوماندالارىن باسقاردى، بۇعان دەيىن نيدەرلاند قۇراماسىنىڭ باپكەرلىك شتابىندا بولدى. ونىڭ سوڭعى جۇمىس ورنى — ارمەنيا قۇراماسى، ونى 2025 جىلدىڭ تامىزىندا تاستاپ كەتكەن.
فۋتبولشى رەتىندە ۆان ’ت سحيپ «اياكس»، يتاليالىق «دجەنوا» جانە نيدەرلاند قۇراماسىندا وينادى. ۇلتتىق كوماندا ساپىندا ول 1988 جىلعى ەۋروپا چەمپيونى اتاندى.
قازاقستان قۇراماسىنىڭ جازعى ۇزىلىستەن كەيىنگى العاشقى رەسمي ماچى 26 قىركۇيەككە جوسپارلانعان — كوماندا ۇلتتار ليگاسىندا فارەر ارالدارىمەن قوناقتا وينايدى.