كەتەر مە كوپكە شەيىن دوڭىز ەستەن،
بىلتىرعى قاتتى بوران قىستايعى ەسكەن؟
جەتپىس پەن سەكسەندەگى قاريالار:
«كورمەدىك سۇراپىلدى مۇنداي»، - دەسكەن.
ۇسكىرىك، اياز، بوران ارالاەقان،
ەكى ءۇيدىڭ اراسىندا جان اداسقان.
قاباعىن ءتۇيىپ كەلگەن قاھارلى جۇت
سالدى ويناق ساحاراعا ۋىتىن شاشقان.
مۇندايدا كاسقىر قاراپ قالسىن نەگە؟
قاشاننان ءتىسىن قايراپ جۇرگەن نەمە.
كوپ بەردى جۇتقا كومەك ءبىر جاعىنان
دەمەدى: «قىزعانىش قىپ جۇتتا جەمە!»
قىرىلدى قوستى جىلقى سورعا ءتۇسىپ،
ومبى قار، تەرەڭ ساي مەن ورعا ءتۇسىپ،
حال كەتكەن قايىرۋعا جىلقىشىلار.
جانىمەن «قوش» ايتىستى ولار دا ءۇسىپ.
ۇستىندە ۇزىن جولدىڭ قالاشىلار،
(كۇن بار ما كەدەي سوردىڭ باعى اشىلار).
توقتاۋسىز كۇنى-تۇنى سوققان بوران،
ءبىرازىن قالعان باسىپ قازاسى بار.
بالالار بوقشا ارقالاپ بارىن كيگەن،
ساباققا بارماقشى بوپ شىققان ۇيدەن،
جەتكەنشە اياق-قولىن دومبىقتىرىپ،
بەتىنەن تىزىلداتىپ اياز سۇيگەن.
سۋاتقا مال سۋعارا بارعان مالاي،
كەلەدى قۇلاق-مۇرنىن و دا ۋقالاي.
كەنەتتەن ءبىر مەزگىلدە بوران سوعىپ،
لاعىپ قۇبا جونعا كەتكەن تالاي.
جىلقىنى دوڭىز سولاي قىرىپ كەتتى،
جۇمىسىن ءبىتىردى دە ءجۇرىپ كەتتى.
سان بايلار جۇگەن ۇستاپ قالا بەرىپ،
ساباسىن كەرەگەگە ءىلىپ كەتتى.
قايران ەل، قانداي ەدىڭ زامانىندا
كۇن بۇرىن ساقتانبادىڭ امانىندا.
الدىنا جاۋ مەن جۇتتىن ايداپ سالىپ،
سويتەتىن قور بولىپ جۇرت كالارىندا.
جاز تۋسا بەيعام ەدىڭ قىس جەتپەستەي،
قىزىق كۇن باستان، ءسىرا، ھەش وتپەستەي.
«جاراتقان قۇداي ارتىق حالىقپىز» دەپ،
قولىنان، ءتورت تۇلىك مال ءبىر كەتپەستەي.
كوردى مە ەندى كوزىڭ كەتكەندىگىن،
زامانا ءوز جۇمىسىن ەتكەندىگىن.
ساقتانباي سالاق وسكەن جالقاۋ جۇرتتى،
كوندىرىپ كەدەيلىككە جەتكەندىگىن؟
اقىلىن جاناشىردىڭ الماۋشى ەدىڭ،
سوزىنە، ءسىرا، قۇلاق سالماۋشى ەدىڭ.
قىمىزعا شەكەڭ قىزىپ، تويساڭ ەتكە -
پايداسىز قۇرعاق داۋعا تالماۋشى ەدىڭ.
جاز جيماي قىس ازىعىن جاتۋشى ەدىڭ،
ارزانعا قىمباتىڭدى ساتۋشى ەدىڭ.
ەڭبەكپەن تابار پايداڭ بولماعان سوڭ،
بورىشقا ششاش ەتەكتەن باتۋشى ەدىڭ.
بالاڭدى وقىت دەسە قاشۋشى ەدىڭ،
مالىڭدى «پارتياعا» شاشۋشى ەدىڭ.
الدىندا دۇرىستىقتىڭ كوزدى جۇمىپ،
اڭقىلداپ تەرىس ىسكە باسۋشى ەدىڭ.
كەڭ قونىس، اتا مەكەن ەتكەن جوق پا؟
ورنىنا «حاحول» سۇمىراي جەتكەن جوق پا؟
مال بولسا بار سەنگەنىڭ و دا ازايىپ،
زامانى كوشى-قوننىڭ وتكەن جوق پا؟
كاسىپسىز كيىن جۇرتتىڭ كۇن كورۋى،
شارۋانىڭ وسى كەزدە كەتتى ءتۇرى.
ءجۇز جىلقى قارعا سالعان قازاقتاردان،
حاحول باي پار وگىزدى...جازعىتۇرى.
قارا جەر انامىز عوي ءبىزدى تاپقان،
ولگەندە تاعى قايتا قوينىن اشقان.
قول ءۇزىپ، سول انادان ايرىلماساق،
ولتىرەر ءبىزدى ءتىپتى قالاي اشتان؟..

---