«جىندى ماكس» كۋلتتىك فرانشيزاسىنىڭ اۆتورى، اتى اڭىزعا اينالعان رەجيسسەر دجوردج ميللەر العاش رەت قازاقستانعا ارناپ رەسمي بەينەۇندەۋ جازدى. ول كوناەۆتا وتەتىن Drive Forum Great Orda اۆتو- جانە موتوتۋريزم فەستيۆالىنىڭ ۇيىمداستىرۋشىلارى مەن قوناقتارىنا جۇگىندى، دەپ حابارلايدى infohub.kz سايتى.
«وسكار» يەگەرى ءوز ۇندەۋىندە «جىندى ماكس» الەمى فەستيۆالدى ۇيىمداستىرۋشىلاردى شابىتتاندىرعانىنا قۋانىشتى ەكەنىن ايتتى. «جىندى ماكس تۋرالى وقيعانىڭ شىنايى رۋحى – تەك كولىكتەر مەن ءشول دالا جولدارى عانا ەمەس، سونىمەن قاتار ەركىندىك، باتىلدىق جانە كەز كەلگەن قيىندىققا قاراماستان العا ۇمتىلۋ. ءارقايسىڭىزعا جاڭا دوستار، كەرەمەت شىتىرمان وقيعالار – ۇمىتىلماس، بارلىق جاعىنان شابىتتاندىراتىن ساتتەر تىلەيمىن. جولدا كەزدەسكەنشە!» – دەدى ميللەر.
Drive Forum Great Orda فەستيۆالى 24-26 شىلدە ارالىعىندا كوناەۆتاعى قاپشاعاي سۋ قويماسىنىڭ جاعاسىندا وتەدى. ۇيىمداستىرۋشىلار «جىندى ماكس» الەمىن ەسكە تۇسىرەتىن اپاتتان كەيىنگى الەم اتموسفەراسىن ۋادە ەتەدى. فەستيۆالعا 1،5 مىڭنان استام قاتىسۋشى جينالادى دەپ كۇتىلۋدە. قازاقستان، رەسەي، وزبەكستان، قىرعىزستان جانە باسقا ەلدەردەن ساياحاتشىلار مەن اۆتوتۋريزم اۋەسقويلارى كەلەدى. شەتەلدىك قوناقتار اراسىندا كيپردەن ۇيىمداسقان توپ تا بولادى. جوبانىڭ سەرىكتەسى – حالىقارالىق MadWay Rally كومانداسى.
«فەستيۆال ەجەلگى كوشپەندىلەر مادەنيەتى مەن ەۋرازيا دالا كەڭىستىگىنىڭ داستۇرلەرىن زاماناۋي ترەندتەرمەن ۇشتاستىرادى. جوبا ەكسپەديسيالىق تۋريزمگە سەرپىن بەرىپ، كونايەۆ قالاسىن كوپفۋنكسيونالدى كۋرورتتىق جانە event-كلاستەر رەتىندە دامىتۋعا باعىتتالعان. بولاشاقتا Drive Forum GREAT ORDA ءىرى تاقىرىپتىق فەستيۆالدار، اۆتوسپورت جانە تاريحي رەكونسترۋكسيا اۋەسقويلارى ءۇشىن باستى ورتالىق ازيالىق حابقا اينالىپ، الەمدەگى ءىرى انالوگتارمەن باسەكەلەسە الادى»، – دەپ تۇيىندەدى قازاقستان ءتۋريزمى.
بۇعان دەيىن قازاقستاندا جاعاجاي ماۋسىمى قىزعان تۇستا الماتىلىقتار قاپشاعايعا جەتۋدىڭ جىلدام ءارى ارزان جولدارىن ىزدەپ جۇرگەنى حابارلانعان بولاتىن. كونايەۆ پەن ونىڭ جاعاجايلارىنا بارۋدىڭ ەڭ ارزان ءارى دالەلدەنگەن ءتاسىلى – پويىز ەكەن.