شەشەنستان باسشىسى رامزان قادىروۆ ۋكرايناعا قارۋ-جاراق جەتكىزىپ، ءارتۇرلى قولداۋ كورسەتىپ جاتقان ەلدەرگە اسكەري جولمەن جاۋاپ بەرۋگە شاقىردى، دەپ حابارلايدى infohub.kz.
رامزان قادىروۆ بۇل ۇسىنىسىن Telegram-داعى پاراقشاسىندا جازدى. ونىڭ ايتۋىنشا، جاياۋ اسكەرلەر ۆلاديمير ءپۋتيننىڭ بۇيرىعىمەن كەز كەلگەن باعىتقا شىعۋعا دايىن. ول "ناتو دەگەن اببرەۆياتۋرانى جامىلىپ، ۇياتسىز، اشىق تۇردە ۋكرايناعا قارۋ-جاراق، دەرەكتەر جانە باسقا دا قولداۋ كورسەتىپ جۇرگەن ەلدەردەن باستاۋعا بولادى" دەپ سانايدى.
"ەگەر ولار رەسەيدىڭ بولىپ جاتقاننىڭ بارىنە سابىرمەن قاراپ، قول قۋسىرىپ وتىرمايتىنىن تۇسىنبەسە، وندا ولارعا بۇل تۋرالى قاراپايىم، تۇسىنىكتى تىلدە ايتۋدىڭ ۋاقىتى كەلدى. (...) ءتروتيلدىڭ ءيىسىن سەزگەن بويدا، كالاشنيكوۆتىڭ ءۇنى مەن ت-90-نىڭ سىقىرلاعانىن ەستىگەندە، ءبارى ءتۇسىنىپ، اقيقاتقا كەلەدى. اتىس اشاتىن كەز كەلدى، ايتپەسە!"، — دەپ جازدى قادىروۆ.
شەشەنستان باسشىسى رەسەي ءقازىر بەيبىت تۇرعىندار اراسىنداعى شىعىندى بارىنشا ازايتىپ، جەڭىل سوعىس قيمىلدارىن جۇرگىزىپ جاتقانىن ايتتى. "ءبىراق ءبىزدىڭ سوعىس ماشينامىزدىڭ تەجەگىشىن بوساتقاندا، (...) بارلىق باتىس كوشباسشىلارى تەرەڭ كەشىرىم سۇراۋ ءۇشىن كەزەككە تۇرادى"، — دەپ قورىتىندىلادى رامزان قادىروۆ.