قازاقستان ۇلتتىق بانكىنىڭ بۇرىنعى باسشىسى قايرات كەلىمبەتوۆ كاسىپكەر تيمۋر تۇرلوۆتىڭ Freedom Holding Corp كومپانياسىنىڭ ديرەكتورلار كەڭەسىنەن كەتتى. بۇل تۋرالى Astana International Exchange (AIX) بيرجاسىنىڭ سايتىندا حابارلاندى، دەپ حابارلايدى infohub.kz.
كادرلىق وزگەرىس 8 شىلدەدە بولدى. حولدينگتە بۇل وتستاۆكا ەشقانداي كەلىسپەۋشىلىكتەرگە بايلانىستى ەمەس ەكەنىن مالىمدەدى.
كەلىمبەتوۆ كەتكەننەن كەيىن حولدينگتىڭ ديرەكتورلار كەڭەسىندەگى مۇشەلەر سانى جەتىدەن التىعا قىسقاردى.
قايرات كەلىمبەتوۆ Freedom Holding Corp ديرەكتورلار كەڭەسىنە 2024 جىلدىڭ ماۋسىم ايىنىڭ باسىندا كىردى. ال 2023 جىلدىڭ قىركۇيەگىندە ول تيمۋر تۇرلوۆتىڭ Freedom Horizons زەرتتەۋ كومپانياسىندا كەڭەسشى قىزمەتىنە تاعايىندالدى. سول كەزدە تۇرلوۆ كەڭەستىڭ جەتى ادامعا كەڭەيتىلۋى كورپوراسيانىڭ يۋريسديكسياسىنىڭ كەڭەيۋىنە جانە ءارتۇرلى سالالارداعى باسقارۋشىلاردىڭ تاجىريبەسىنە دەگەن قاجەتتىلىككە بايلانىستى ەكەنىن ءتۇسىندىردى.
57 جاستاعى قايرات كەلىمبەتوۆ — قازاقستان ۇلتتىق بانكىنىڭ بۇرىنعى باسشىسى (2013 جىلدىڭ قازانىنان 2015 جىلدىڭ قاراشاسىنا دەيىن). ونىڭ باسقارۋىمەن 2014 جىلدىڭ اقپانىندا جانە 2015 جىلدىڭ تامىزىندا تەڭگە ەكى ەسە قۇنسىزدانىپ، ودان كەيىن رەتتەۋشى ۇلتتىق ۆاليۋتانىڭ باعامىن ەركىن اينالىمعا كوشىردى. بانك قىزمەتىنەن كەيىن كەلىمبەتوۆ 2015 جىلدىڭ سوڭىنان 2023 جىلدىڭ قاڭتارىنا دەيىن «استانا» حالىقارالىق قارجى ورتالىعىنىڭ باسقارۋشىسى بولدى. ۇلتتىق بانككە دەيىن ول پرەمەر-مينيستردىڭ ورىنباسارى بولىپ جۇمىس ىستەدى. 2011 جىلى قازاقستاننىڭ ەكونوميكالىق دامۋ جانە ساۋدا ءمينيسترى قىزمەتىن اتقاردى، 2008-2011 جىلدارى «سامۇرىق-قازىنا» ۇلتتىق ءال-اۋقات قورىن باسقاردى.