بۇگىن، 11 تامىزدا، تۇركىستاندا ۋەفا چەمپيوندار ليگاسىنىڭ ءۇشىنشى ىرىكتەۋ كەزەڭىنىڭ جاۋاپتى ماچى وتەدى. الماتىلىق «قايرات» بولگاريالىق «لەۆسكي» كومانداسىمەن كەزدەسەدى. ويىن قارساڭىندا پوليسيا فۋتبول جانكۇيەرلەرىنە ەسكەرتۋ جاسادى، دەپ حابارلايدى infohub.kz سايتى.
«ءىىم جاڭالىقتارى» Telegram-ارناسىندا حابارلانعانداي، قۇقىق قورعاۋ ورگاندارى «تۇركىستان ارەنا» ستاديونىندا وتەتىن ماچ باستالار الدىندا قوعامدىق ءتارتىپ پەن قاۋىپسىزدىكتى قامتاماسىز ەتۋ شارالارىن كۇشەيتتى. پوليسيا قالا تۇرعىندارى مەن قوناقتارىن قوعامدىق ءتارتىپتى ساقتاۋعا، اينالاسىنداعىلاردىڭ قاۋىپسىزدىگىنە جاۋاپكەرشىلىكپەن قاراۋعا جانە پوليسيا قىزمەتكەرلەرىنىڭ زاڭدى تالاپتارىن ورىنداۋعا شاقىرادى.
«فۋتبول ماچىن تاماشالاۋعا كەلگەن جانكۇيەرلەردى بىر-بىرىنە قۇرمەتپەن قاراۋعا، ارانداتۋشىلىق ارەكەتتەرگە جول بەرمەۋگە، قوعامدىق ورىنداردا ءتارتىپ ساقتاۋعا جانە بەلگىلەنگەن قاۋىپسىزدىك تالاپتارىن قاتاڭ ورىنداۋعا شاقىرامىز»، — دەلىنگەن حابارلامادا.
ەسكە سالايىق، بۇعان دەيىن بولگاريالىق «لەۆسكي» ۋەفا چەمپيوندار ليگاسىنىڭ 2026/27 ماۋسىمىندا قازاقستاندىق «قايراتقا» قارسى ءوز الاڭىندا جەڭىسكە جەتكەن بولاتىن. جاۋاپتى ماچ 11 تامىزعا «تۇركىستان ارەنادا» بەلگىلەنگەن ەدى. الماتىداعى ورتالىق ستاديون 14 تامىزعا جوسپارلانعان امەريكالىق رەپەر كانە ۋەستىڭ كونسەرتىنە بايلانىستى بۇل ويىندى قابىلداي المايدى.