قازاقستاندىق ءارتىس قايرات نۇرتاس 27 قىركۇيەكتە Astana Arena ساحناسىندا ونەر كورسەتىپ، شىعارماشىلىعىنىڭ 20 جىلدىعىن ۇلكەن جەكە كونسەرتىمەن اتاپ ءوتتى. كەش باستالار الدىندا كورەرمەندەر كاسپيدە قازا تاپقان اسكەريلەردى ءبىر مينۋت ۇنسىزدىكپەن ەسكە الدى، دەپ حابارلايدى infohub.kz سايتى.
ءانشى ەلورداداعى ستاديوندى تولىق جيناپ، جانكۇيەرلەرىمەن بىرگە شىعارماشىلىق قىزمەتىنىڭ 20 جىلدىق مەرەيتويىن تويلادى. كونسەرت باستالار الدىندا ءارتىس كاسپيدە قازا تاپقان جاس اسكەريلەردى ءبىر مينۋت ۇنسىزدىكپەن ەسكە الۋدى ءوتىندى.
«كونسەرتتىڭ اشىلۋى. ءبىر مينۋت ۇنسىزدىك. 35 مىڭ ادام. تىنىشتىق. قازاقستاندىقتار امان-ەسەن بولسىن»، — دەپ جازدى ءانشىنىڭ اناسى ءارى پروديۋسەرى گۇلزيرا ايداربەكوۆا.
قايرات نۇرتاس جانكۇيەرلەرىن جاڭا اندەرىمەن، ءتۇرلى-تۇستى كوستيۋمدەرىمەن جانە ءقاۋىپتى تريۋكتەرىمەن تاڭ قالدىردى. كورەرمەندەردىڭ ايتۋىنشا، بۇل ناعىز شوۋ بولدى.
«راقمەت، استانا! 35 مىڭ كورەرمەن. ءبىر ستاديون. ءبىر جۇرەك. بۇل ۇمىتىلماس كەش بولدى»، — دەپ العىس ايتتى جانكۇيەرلەرىنە قايرات نۇرتاس.
جانكۇيەرلەر كوپتەگەن جىلى لەبىزدەر قالدىردى: «براۆو! تاماشا كونسەرت بولدى»، «20 جىلدان بەرى اڭىز! كونسەرت ەمەس، ەرتەگى! ءان سالىپ، ورنىندا وتىرا الماي، بيگە باستىق»، «ءسوز جوق، سەن ناعىز شوۋ جاسادىڭ»، «ارەنا تولى، ءتىرى داۋىس، كەرەمەت اتموسفەرا — بۇكىل ستاديون ءان سالىپ، بيلەدى! قايرات نۇرتاس، بۇل قۋاتتى بولدى».
4 قازاندا ءارتىس الماتىدا كونسەرت بەرەدى. ول سونداي-اق شىمكەنت، قىزىلوردا، اتىراۋ جانە اقتوبەدە ونەر كورسەتەدى.