اقش-تىڭ كاليفورنيا شتاتىندا، لوس-اندجەلەس قالاسىنىڭ ماڭىنداعى كاتالينا ارالىنىڭ تۇبىندە مەديسينالىق تىكۇشاق اپاتقا ۇشىراپ، ەكى ادام قازا تاپتى، تاعى ەكەۋى اۋرۋحاناعا جات قىزىلدى، دەپ حابارلايدى infohub.kz سايتى.
لوس-اندجەلەس وكرۋگىنىڭ ءورت ءسوندىرۋ قىزمەتى الەۋمەتتىك جەلىدەگى جازباسىندا بەيسەنبى كۇنى تاڭەرتەڭ ۇشاقتا بولعان جانە ءىز-تۇزسىز جوعالعان بەسىنشى ادامدى ىزدەۋ جۇمىستارى جۇرگىزىلىپ جاتقانىن مالىمدەدى.
قۇتقارۋشىلار سارسەنبى كۇنى كەشكە ساعات سەگىزگە تاياۋ اپات بولعان جەرگە شاقىرىلىپ، سۋدان ءتورت ادامدى الىپ شىقتى. ءورت ءسوندىرۋ قىزمەتىنىڭ حابارلاۋىنشا، ەكەۋى وقيعا ورنىندا قازا تاپتى، تاعى ەكەۋى تۇراقتى جاعدايدا ماتەريكتەگى اۋرۋحانالارعا جەتكىزىلدى.
«بۇل — ءتۇنى بويى جالعاسقان ىزدەۋ-قۇتقارۋ جۇمىستارى ءجۇرىپ جاتقان بەلسەندى ايماق»، — دەدى ۆەدومستۆو.
ۇلتتىق كولىك قاۋىپسىزدىگى كەڭەسى اپاتقا قاتىستى تەرگەۋ جۇرگىزىپ جاتقانىن حابارلادى.
لوس-اندجەلەس وكرۋگىنىڭ اكىمشىسى دجەنيس حان ءوزىنىڭ X جەلىسىندەگى جازباسىندا مەديسينالىق ەۆاكۋاسيالىق تىكۇشاق كاتالينادان ۇشقاننان كەيىن كوپ ۇزاماي اپاتقا ۇشىراعانىن ەستىگەنىن ايتتى.
رەسمي وكىلدەردىڭ مالىمدەۋىنشە، وقيعا ورنىنا وكرۋگتىڭ ءورت سوندىرۋشىلەرى مەن قۇتقارۋشىلارى، سونداي-اق اقش جاعالاۋ كۇزەتى مەن شەريف قىزمەتى جۇمىلدىرىلدى.
بيلىك وكىلدەرى تىكۇشاق كاتالينانىڭ تۇبىندە 240 فۋت (73 مەتر) تەرەڭدىكتە سۋعا باتقانىن ايتتى. ارال لوس-اندجەلەس وكرۋگىنىڭ ماتەريگىنەن شامامەن 22 ميل (35 شاقىرىم) قاشىقتىقتا ورنالاسقان.
KTLA-TV تەلەارناسىنىڭ حابارلاۋىنشا، تىكۇشاق كاليفورنيا شتاتىنداعى ساكرامەنتو قالاسىندا ورنالاسقان Reach Air Medical Services كومپانياسىنا تيەسىلى بولعان.