رەسەيدىڭ ۋكرايناعا قارسى تولىققاندى سوعىسى باستالعان 2022 جىلدىڭ اقپانىنان بەرى ەۋروپالىق وداق كيەۆكە 220 ميلليارد ەۋرودان استام كومەك كورسەتتى. بۇل تۋرالى ەو ديپلوماتياسىنىڭ باسشىسى كايا كاللاس ستراسبۋرگتە ەۋروپارلامەنتتىڭ پلەنارلىق وتىرىسىندا سويلەگەن سوزىندە مالىمدەدى، دەپ حابارلايدى infohub.kz سايتى.
ەو ديپلوماتياسى باسشىسىنىڭ ءسوزى ەۋروپالىق وداق ديپلوماتيالىق قىزمەتىنىڭ رەسمي سايتىندا جاريالاندى. كاللاستىڭ ايتۋىنشا، ەو مەن وعان مۇشە مەملەكەتتەر تاراپىنان ۋكرايناعا كورسەتىلگەن اسكەري قولداۋ 78 ميلليارد ەۋرودان اسقان.
سونىمەن قاتار ۋكراينانى قولداۋعا ارنالعان كرەديت ەكى جىل ىشىندە 90 ميلليارد ەۋرو ءبولۋدى كوزدەيدى، ونىڭ 60 ميللياردى اسكەري كومەككە جوسپارلانعان. ونىڭ ىشىندە Patriot زىمىراندارىن ساتىپ الۋعا ارنالعان قاراجات تا بار — 8،35 ميلليارد ەۋرو تولەنىپ قويدى.
«ەۋروپالىقتار تاراپىنان ەڭ ايقىن ءارى دەرەۋ قاجەت جاۋاپ — ەۋروپالىق بەيبىتشىلىك قورى اياسىندا قولجەتىمدى قارجىلاندىرۋدى پايدالانۋ. ءبىز اسكەري قولداۋعا تاعى ءبىر ميلليارد ەۋرو بولە الامىز. مەن وسى قاراجاتتى ءبولۋ بويىنشا مۇشە مەملەكەتتەرمەن جۇمىس ىستەپ جاتىرمىن»، — دەدى كاللاس.