كانادا اقش-تان اكەلىنەتىن تاۋارلارعا 15%، 25% جانە 50% مولشەرىندە جاۋاپ باج سالىعىن ەنگىزەتىنىن حابارلادى، دەپ حابارلايدى infohub.kz.
كانادا قارجى مينيسترلىگىنىڭ مالىمەتىنشە، جاڭا باج سالىعى بولات، ەلەكترونيكا، ءسۇت ونىمدەرى، اۋىل شارۋاشىلىعى تەحنيكاسى، تۇرمىستىق تەحنيكا جانە سەلليۋلوزا-قاعاز ونەركاسىبىن قامتيدى. شەكتەۋگە ىلىگەتىن تاۋارلاردىڭ جالپى كولەمى 20 ميلليارد اقش دوللارىنا باعالانىپ وتىر.
ۇكىمەت مالىمدەمەسىندە: «2026 جىلدىڭ 8 قىركۇيەگىنەن باستاپ كانادا تاۋارلارعا 15%، 25% جانە 50% مولشەرىندە باج سالىعىن ەنگىزەدى... كانادانىڭ جاۋاپ باج سالىعى اقش-تان اكەلىنەتىن 27،6 ميلليارد كانادا دوللارى (19،9 ميلليارد اقش دوللارى – رەد.) كولەمىندەگى ونىمگە قولدانىلادى جانە نەگىزىنەن بولات، ءسۇت ونىمدەرى، تۇرمىستىق تەحنيكا، اۋىل شارۋاشىلىعى تەحنيكاسى، سەلليۋلوزا-قاعاز ونەركاسىبى جانە ەلەكترونيكا سياقتى اقش باج سالىعىنان كوبىرەك زارداپ شەككەن سەكتورلارعا باعىتتالادى»، — دەلىنگەن.
سونىمەن قاتار، كانادا بيلىگى باج سالىعىنىڭ ەنگىزىلۋىنەن زارداپ شەگۋى مۇمكىن جەرگىلىكتى كاسىپكەرلەر مەن جۇمىسشىلاردى قولداۋ ءۇشىن 5،4 ميلليارد اقش دوللارى بولىنەتىنىن جەكە حابارلادى.
بۇعان دەيىن كانادا پرەمەر-مينيسترى مارك كارني وتتاۆا اقش-قا قاتىستى «دوللارعا دوللار» ءپرينسيپى بويىنشا جاۋاپ باج سالىعىن ەنگىزەتىنىن مالىمدەگەن ەدى. بۇعان جاۋاپ رەتىندە اقش پرەزيدەنتى دونالد ترامپ كانادا ساياساتىن ءساتسىز دەپ اتاپ، ەل باسشىلىعىن، ونىڭ ىشىندە پرەمەر-مينيستر مارك كارني مەن ونتاريو پروۆينسياسىنىڭ پرەمەرى داگ فوردتى قۇزىرەتسىز دەپ سىنادى.