كانادالىق Porter Airlines اۋەكومپانياسى ۆانكۋۆەر ارالىنداعى ۆيكتوريادان تورونتوعا ۇشاتىن رەيسىن بالانىڭ قاۋىپسىزدىك بەلدىگىن تاقپاۋىنا بايلانىستى توقتاتتى. بۇل تۋرالى infohub.kz سايتى حابارلايدى.
6 تامىزداعى رەيس ۇشۋ-قونۋ جولاعىنا تاكسيلەپ بارا جاتقاندا، بالا ورىندىقتا تۇرىپ العان. ەرەسەك ادام مەن ەكيپاجدىڭ بىرنەشە ارەكەتىنە قاراماستان، بالانى وتىرعىزۋ مۇمكىن بولماعاندىقتان، ەكيپاج تەرمينالعا قايتىپ ورالىپ، ەكى جولاۋشىنى ۇشاقتان تۇسىرۋگە شەشىم قابىلداعان. اۋەكومپانيانىڭ مالىمەتىنشە، مۇنداي ءقاۋىپتى جاعدايدا ۇشاق ۇشا المايدى.
اۋەكومپانيا وكىلى برەد سيسەرو Canadian Broadcasting Corporation (CBC) تەلەارناسىنا بەرگەن سۇحباتىندا، بارلىق جولاۋشىلار ۇشاقتان تۇسۋگە ءماجبۇر بولعانىن، سەبەبى تەك بالا مەن اتا-اناسىن ءتۇسىرىپ، قۇجاتتاردى قايتا رەسىمدەۋگە كەتكەن ۋاقىت ۇشاقتىڭ 12:30-دا جابىلاتىن اۋەجايعا دەيىن ۇشىپ كەتۋىنە مۇمكىندىك بەرمەگەنىن ايتتى. ول باسقا جولاۋشىلارعا كەلتىرىلگەن قولايسىزدىق ءۇشىن كەشىرىم سۇراپ، ولار كەلەسى كۇنى رەيسپەن ۇشا العانىن جەتكىزدى.
جولاۋشى ارە كوزۋچ Canadian Press اگەنتتىگىنە بەرگەن سۇحباتىندا، بالانىڭ ءتارتىپسىز بولماعانىن، ال الەۋمەتتىك جەلىدە اتا-انانى سىناعان پىكىرلەر جاعدايدى تولىق كورسەتپەيتىنىن ايتتى. ونىڭ ايتۋىنشا، بالا ورىندىقتىڭ استىنا تىعىلىپ، بەلدىك تاعۋعا ماجبۇرلەگەندە سىرعىپ شىعىپ كەتكەن. "بۇل 150 ادام وتىرعان ۇشاقتاعى بالا ەدى... ول قاتتى قورقىپ، الدىنداعى ورىندىقتىڭ استىنا تىعىلعان. بۇل جۇگىرىپ ءجۇرىپ ايعايلاعان بالادان مۇلدە بولەك جاعداي"، - دەدى ول.
تاعى ءبىر جولاۋشى حيللاري حەرسبەرگ اۋەكومپانيانىڭ باياۋ ارەكەت ەتكەنىن ايتتى. "بۇل وتە ۇزاققا سوزىلدى. بالا ۇشاقتان 11:30-دا ءتۇستى، سول كەزدە ءبىز ۇشاقتا ءبىر ساعاتقا جۋىق وتىرعانبىز"، - دەدى ول CBC-گە. Porter Airlines جولاۋشىلاردى كەلەسى كۇنگى باسقا رەيسكە قايتا تىركەگەنىن حابارلادى.