امەريكالىق رەپەر كانە ۋەستىڭ سانكت-پەتەربورداعى جوسپارلانعان كونسەرتتەرى وتپەيتىن بولدى — ۇيىمداستىرۋشى كونسەرتتەردىڭ توقتاتىلعانىن حابارلادى، دەپ جازادى infohub.kz سايتى.
ربك اگەنتتىگىنىڭ مالىمەتىنشە، امەريكالىق رەپەر كانە ۋەست سانكت-پەتەربوردا بەلگىلەنگەن كۇندەرى ونەر كورسەتپەيدى. ۇيىمداستىرۋشى جوبانىڭ مارتەبەسى مەن بولاشاق جوسپارلارى تۋرالى رەسمي اقپاراتتى جاقىن ارادا ۇسىناتىنىن مالىمدەدى.
«جاقىن ارادا جوبانىڭ مارتەبەسى مەن بولاشاق جوسپارلارى تۋرالى رەسمي مالىمدەمەمەن شىعامىز. ساتىپ الىنعان بيلەتتەر ءۇشىن اقشانى قايتارۋ مۇمكىندىگى دۇيسەنبى، 2026 جىلعى 12 قازاندا اشىلادى»، — دەلىنگەن حابارلامادا.
Say Agency اگەنتتىگى قايتارۋ ەرەجەلەرى مەن شارتتارى تۋرالى تولىق اقپاراتتى «ءسال كەيىنىرەك» جاريالايتىنىن ۋادە ەتتى.
ال «كوممەرسانت» باسىلىمى سانكت-پەتەربوردا پوليسيانىڭ كانە ۋەستىڭ وتپەيتىن كونسەرتتەرىن ۇيىمداستىرۋشىعا قاتىستى تەرگەۋگە دەيىنگى تەكسەرۋ باستاعانىن حابارلايدى. ءسوز ەرەكشە ءىرى مولشەردەگى الاياقتىق تۋرالى بولىپ وتىر.
ايتپاقشى، كانە ۋەستىڭ كونسەرتتەرى 10 جانە 11 قازاندا «گازپروم ارەنادا» ءوتۋى ءتيىس ەدى. بيلەتتەر 9 مىڭنان 160 مىڭ رۋبلگە دەيىنگى باعامەن ساتىلدى (شامامەن 48 مىڭ تەڭگەدەن 846 مىڭ تەڭگەگە دەيىن — رەد. ەسكەرتپەسى). كونسەرتتەر توقتاتىلعان سوڭ ساتىپ الۋشىلار اقشانى قايتارۋدى تالاپ ەتىپ، جول شىعىندارىن قوسا وتىرىپ، سوتقا شاعىمدانا باستادى.
بۇعان دەيىن ءبىز كانە ۋەستىڭ الماتىداعى كونسەرتى قالاي وتكەنىن حابارلاعان بولاتىنبىز.