امەريكاندىق رەپەر كانە ۋەست الماتىدا 14 تامىزعا جوسپارلانعان كونسەرتىنىڭ 15 تامىزعا اۋىستىرىلعانىن رەسمي راستادى. بۇل تۋرالى مۋزىكانت ءوزىنىڭ الەۋمەتتىك جەلىلەرىندە حابارلادى، دەپ حابارلايدى NUR.KZ. بۇعان دەيىن ورتالىق ستاديونعا جينالعان كورەرمەندەرگە ۇزاق كۇتۋدەن كەيىن ونەرپاز ساحناعا شىقپاعان سوڭ، كونسەرتتىڭ كەيىنگە شەگەرىلگەنى ايتىلعان ەدى. كانە ۋەست ءوز ۇندەۋىندە: «قۇرمەتتى الماتى تۇرعىندارى! اۋا رايىنا بايلانىستى بۇگىنگى كونسەرت ەرتەڭگە اۋىستىرىلدى. دەنساۋلىق پەن قاۋىپسىزدىك — ءبىزدىڭ باستى نازارىمىزدا. ەرتەڭ كەزدەسكەنشە!» — دەپ جازدى، دەپ حابارلايدى infohub.kz سايتى.
ەسكە سالايىق، بۇگىن الماتىدا، الماتى وبلىسىندا جانە قازاقستاننىڭ باسقا دا ايماقتارىندا ءىرى بلەكاۋت بولدى. ەنەرگەتيكا مينيسترلىگىنىڭ ءباسپاسوز قىزمەتىنىڭ مالىمەتىنشە، ونىڭ سەبەبى — ورتالىق ازيا ەنەرگوجۇيەسىنەن ەلەكتر ەنەرگياسى اعىنىنىڭ كۇرت وزگەرۋىنەن تۋىنداعان ەنەرگوجۇيەدەگى قۋاتتىڭ ارتۋى. الماتىداعى جاپپاي ەلەكتر قۋاتىنىڭ ءوشۋى كانە ۋەستىڭ كونسەرتى الدىندا قيىندىقتار تۋعىزدى، الايدا ۇيىمداستىرۋشىلار كورەرمەندەردى ستاديونعا كىرگىزۋدى جالعاستىردى. ال اۋا رايى شىنىمەن دە قۇبىلدى — كونسەرت باستالۋعا ءبىر ساعات قالعاندا كۇندىزگى ىستىق ۋراگان مەن نايزاعايعا ۇلاستى. جەلدىڭ ەكپىنى ستاديون ماڭىنداعى دارەتحانانىڭ جانىنداعى شاتىرلاردى ۇشىرىپ كەتتى. الايدا ولاردى بىردەن ورنىنا قايتا ورناتتى.