«قايرات» فك اتاقتى رەپەر كانە ۋەستتىڭ كونسەرتىنە بايلانىستى ماچتارىن الماتىدان تۇركىستانعا اۋىستىرۋ تۋرالى رەسمي مالىمدەمە جاسادى، دەپ حابارلايدى infohub.kz سايتى. اۋىستىرۋدى ۋەفا ماقۇلداعانى اتاپ ءوتىلدى.
ەسكە سالايىق، 17 شىلدەدە كانە ۋەستتىڭ الماتىدا كونسەرت بەرۋى مۇمكىن ەكەندىگى تۋرالى اقپارات پايدا بولدى. الدىمەن بۇل تۋرالى ونىڭ مەنەدجەرى دجوزەف كاررە حابارلادى، كەيىن الماتى اكىمدىگى كونسەرتتىڭ 14 تامىزدا ساعات 21:00-دە ورتالىق ستاديوندا وتەتىنىن راستادى.
الايدا كونسەرت جاريالانعاننان كەيىن «قايرات» فك باسشىلىعى ولارمەن ءىس-شارانى ورتالىق ستاديوندا وتكىزۋ كەلىسىلمەگەنىن مالىمدەدى.
بۇگىن كلۋبتىڭ ءباسپاسوز قىزمەتى جاڭا مالىمدەمە جاريالاپ، وندا كونسەرتتىڭ ەۋروكۋبوكتىڭ ءۇشىنشى ىرىكتەۋ راۋندىنداعى ۇيدەگى ماچ كەزەڭىنە سايكەس كەلەتىنىن، سوندىقتان «قايرات» فك-نىڭ ءۇي ارەناسى قولجەتىمسىز بولاتىنىن ەسكە سالدى. مالىمدەمەدە: "قالىپتاسقان جاعدايلاردى جانە ەۋروكۋبوكتەگى قارسىلاستىقتىڭ تىعىز كەستەسىن ەسكەرە وتىرىپ، كلۋب ءۇشىنشى ىرىكتەۋ راۋندىنداعى ىقتيمال ءۇي ماچىنىڭ وتەتىن ورنىن اۋىستىرۋ تۋرالى وتىنىشپەن ۋەفا-عا جۇگىندى. وسى ءوتىنىشتى قاراۋ ناتيجەسىندە كەزدەسۋدى تۇركىستان قالاسىنداعى «تۇركىستان ارەنا» ستاديونىندا وتكىزۋ كەلىسىلدى"، — دەلىنگەن.
ماچتىڭ كۇنى مەن ۋاقىتى، سونداي-اق بيلەت ساتىلىمىنىڭ باستالۋى تۋرالى اقپارات كوماندانىڭ ەۋروكۋبوكتەگى ودان ءارى جولى انىقتالعاننان كەيىن قوسىمشا جاريالاناتىنى حابارلانادى.