قاپشاعاي سۋ قويماسىندا ايەل مەن ءجاسوسپىرىم ىسىنگەن ديۆاندا سىرعاناۋدان كەيىن توسەككە تاڭىلدى، دەپ حابارلايدى infohub.kz.
وقيعا شىلدە ايىنىڭ سوڭىندا قاپشاعاي سۋ قويماسىندا بولدى. زارداپ شەككەندەردىڭ ءبىرى – 36 جاستاعى نازيرا وسپانبەك. ول قابىرعالارىنىڭ، قولىنىڭ بىرنەشە جەرى سىنعان، جامباسى سوعىلعان، ىشكى اعزالارى زاقىمدانعان جانە ميى شايقالعان. مۇنىڭ ءبارى سۋداعى اتتراكسيوندا سىرعاناۋدىڭ سالدارى.
«قايىقشى قايىق پەن ديۆاندى توقتاتتى. ءبىز سۋدا تۇردىق. قايىقشىعا ايعايلاي باستادىق: "ءبىزدى جاعاعا اپار"، – دەپ، ءبىراق ول ءبىزدى ەستىمەدى. كۇيەۋىم ىسقىردى دا: "بولدى، جەتكىلىكتى. ءبىزدى جاعاعا اپار"، – دەدى. سول كەزدە قايىقشى ديۆاندى سولعا بۇراتىنداي تراەكتوريامەن قوزعالا باستادى. ءدال سول ساتتە بىزگە گيدروسيكل سوعىلدى»، – دەدى زارداپ شەككەن ايەل.
نازيرا ءۇش وپەراسيادان ءوتتى، ءبىراق ءالى دە توسەكتە جاتىر. «فيزيكالىق اۋىرسىنۋ دا قاتتى مازالايدى، سەبەبى جاتسىڭ دا، قاراپايىم قاجەتتىلىكتەرىڭدى ءوزىڭ وتەي المايسىڭ. بۇل وتە قيىن. ەڭ اۋىرى – وسىعان قاتىسى بارلاردىڭ ەشقايسىسى جاۋاپكەرشىلىككە تارتىلمايدى. ولار سەنىڭ فيزيكالىق اۋىرسىنۋىڭدى بولىسە المايدى»، – دەپ قوستى وسپانبەك.
سول كۇنى ىسىنگەن ديۆاندا سىرعاناۋدى ەكى وتباسى شەشتى. نازيرامەن بىرگە 14 جاستاعى قىز دا قاتتى زارداپ شەكتى. ونىڭ اياعى مەن جامباسى سىنعان، ميى شايقالعان. وقيعادان كەيىن ول كوماعا ءتۇسىپ، تەك التىنشى كۇنى ەسىن جيدى. ءجاسوسپىرىم وپەراسيا جاساتتى، ءقازىر جۇرە دە، وتىرا دا المايدى. توعىزىنشى سىنىپ وقۋشىسى قاشىقتان وقيدى.
«اياعىنا وپەراسيا جاسالدى، گيپس قويىلدى. ءبىر سۇيەك ءۇش جەردەن سىنعان، سوندىقتان پلاستينا سالىندى. ۇنەمى اۋىرسىنۋدى باساتىن ءدارى ىشەمىز. ەموسيونالدىق جاعدايى وتە اۋىر. مۇنىڭ ءبارىن كورۋ قيىن»، – دەدى ءجاسوسپىرىمنىڭ اناسى جانار رىسكۋلوۆا.
زارداپ شەككەندەر پوليسياعا جۇگىندى. وندا قىلمىستىق ءىس قوزعالدى. كۇدىكتى رەتىندە گيدروسيكل جۇرگىزۋشىسى ءوتىپ جاتىر. ول ەركىندىكتە. «تەڭىز نەمەسە وزەن كولىگىن پايدالانۋ نەمەسە جۇرگىزۋ كەزىندە قوزعالىس قاۋىپسىزدىگى ەرەجەلەرىن بۇزۋ فاكتىسى بويىنشا قىلمىستىق ءىس قوزعالدى»، – دەپ حابارلادى الماتى وبلىسى پد ءباسپاسوز قىزمەتى.
زارداپ شەككەندەر گيدروسيكلدى جالعا بەرگەن يەسىن جانە قايىقتى باسقارعان ەر ادامدى دا جاۋاپقا تارتۋدى قالايدى.