قازاقستان قارا تەڭىزدەگى مۇناي تانكەرلەرىنە جاسالعان شابۋىلدارعا قاتىستى حالىقارالىق تەڭىز ۇيىمىمەن (حتۇ) كەلىسسوز جۇرگىزدى، دەپ حابارلايدى infohub.kz.
سىرتقى ىستەر مينيسترلىگىنىڭ مالىمەتىنشە، قازاقستاننىڭ ۇلىبريتانياداعى ەلشىسى الىبەك باقايەۆ حتۇ باس حاتشىسى ارسەنيو دومينگەسپەن كەزدەستى. كەزدەسۋ بارىسىندا قارا تەڭىزدەگى احۋالعا ەرەكشە نازار اۋدارىلدى.
الىبەك باقايەۆ قازاقستاندىق مۇنايدى تاسىمالدايتىن تانكەرلەردى قوسا العاندا، ساۋدا كەمەلەرىنىڭ قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ ءوتتى. ول قازاقستاننىڭ كەمە قاتىناسى ءۇشىن ءقاۋىپسىز جاعدايلار جاساۋعا جانە ەلدىڭ سىرتقى ساۋدا مۇددەلەرى مەن حالىقارالىق ەنەرگەتيكالىق قاۋىپسىزدىك ءۇشىن ماڭىزى زور تەڭىز جولدارىنىڭ تۇراقتىلىعىنا مۇددەلى ەكەنىن جەتكىزدى.
ارسەنيو دومينگەس قازاقستاننىڭ ۇستانىمىن قولداپ، ازاماتتىق جانە ساۋدا كەمەلەرىن قورعاۋدىڭ تۇبەگەيلى ماڭىزدىلىعىن اتاپ ءوتتى. ول حتۇ كەمە قاتىناسى قاۋىپسىزدىگى قاعيداتتارىن ساقتاۋ جانە ازاماتتىق تەڭىز كولىگىن قورعاۋ ءۇشىن دايەكتى تۇردە ارەكەت ەتەتىنىنە سەندىردى.
تاراپتار سونداي-اق كاسپي تەڭىزىنىڭ حالىقارالىق كولىك-لوگيستيكالىق تىزبەكتەردىڭ ماڭىزدى بۋىنى رەتىندەگى ستراتەگيالىق ءرولىن تالقىلادى. ترانسكاسپي حالىقارالىق كولىك باعىتىنىڭ تەڭىز بولىگىن دامىتۋ، كاسپي ارقىلى جۇك تاسىمالى كولەمىن ۇلعايتۋ جانە اقتاۋ مەن قۇرىق پورتتارىن جاڭعىرتۋ ورتالىق ازيا، جۇڭگو جانە ەۋروپا ەلدەرى اراسىنداعى ساۋدا-ەكونوميكالىق بايلانىستار ءۇشىن جاڭا مۇمكىندىكتەر تۋعىزاتىنى اتاپ ءوتىلدى.
حتۇ باس حاتشىسى ودان ءارى ىنتىماقتاستىقتىڭ كەڭ اۋقىمىن اتاپ، ۇيىمنىڭ قازاقستانعا جاردەم كورسەتۋگە دايىن ەكەنىن راستادى.
حالىقارالىق تەڭىز ۇيىمى (حتۇ) — كەمە قاتىناسىنىڭ قاۋىپسىزدىگى مەن كۇزەتى، كەمەلەردەن تەڭىز ورتاسىنىڭ لاستانۋىن بولدىرماۋ جانە حالىقارالىق تەڭىز كولىگىنىڭ باسقا دا ماسەلەلەرى سالاسىنداعى حالىقارالىق نورمالار مەن ستاندارتتاردى ازىرلەيتىن جانە جەتىلدىرەتىن بۇۇ-نىڭ مامانداندىرىلعان مەكەمەسى. قازاقستان 1994 جىلدان بەرى حتۇ مۇشەسى بولىپ تابىلادى.