قاراعاندىدا قازاقستاننىڭ قۇسبەگىلىك اڭشىلىق قۇراماسىنىڭ مۇشەسى بىرنەشە جىل بويى ۇيىندە قىزىل كىتاپقا ەنگەن 35 جىرتقىش قۇستى، سونىڭ ىشىندە يتەلگىلەردى، بۇركىتتەردى جانە لاشىنداردى زاڭسىز ۇستاعان. ءتىنتۋ كەزىندە قارجىلىق مونيتورينگ اگەنتتىگىنىڭ قىزمەتكەرلەرى قۇستاردى الىپ، كۇدىكتى قاماۋعا الىندى، دەپ حابارلايدى infohub.kz سايتى.
قارجىلىق مونيتورينگ اگەنتتىگىنىڭ مالىمەتىنشە، ەر ادام 2017 جىلى ءۇيىنىڭ اۋماعىندا زاڭسىز پيتومنيك ۇيىمداستىرعان. ول «قۇسبەگىلىك» فەدەراسياسىنا مۇشە بولىپ، ۇلتتىق قۇسبەگىلىك اڭشىلىق بويىنشا قازاقستان قۇراماسىنا كىرگەن.
تەرگەۋ نۇسقاسى بويىنشا، كۇدىكتى Instagram-دا ۇلتتىق اڭشىلىق، قۇستاردى ۇستاۋ جانە ەمدەۋ تۋرالى ايتىپ وتىرعان. الەۋمەتتىك جەلى ارقىلى ول تابيعي ورتادان اۋلانعان سيرەك كەزدەسەتىن جىرتقىشتاردى اكەپ بەرەتىن ادامدارمەن تانىسقان.
«تۇرعىلىقتى مەكەنجايىندا جۇرگىزىلگەن ءتىنتۋ كەزىندە 35 جىرتقىش قۇس، ونىڭ ىشىندە يتەلگىلەر، بۇركىتتەر جانە لاشىندار تابىلىپ، الىندى. اتالعان تۇرلەر قىزىل كىتاپقا ەنگىزىلگەن جانە سيرەك كەزدەسەتىن، جويىلىپ كەتۋ ءقاۋپى تونگەن جانۋارلار قاتارىنا جاتادى. كۇدىكتى قاماۋعا الىندى. سوت سانكسياسىمەن وعان تيەسىلى Toyota 4Runner كولىگىنە تىيىم سالىندى»، – دەپ اتاپ ءوتتى قما-دا.
اگەنتتىكتە سونداي-اق ۇكىم زاڭدى كۇشىنە ەنگەننەن كەيىن قۇستاردى جابايى تابيعاتقا قايتا جىبەرۋ جوسپارلانىپ وتىرعانىن حابارلادى. تەرگەۋدىڭ باسقا مالىمەتتەرىن ۆەدومستۆو جاريالامايدى.
بۇعان دەيىن رەداكسيا ۇلتتىق پارك قىزمەتكەرلەرىنىڭ قىزىل كىتاپقا ەنگەن قۇستاردى شەتەلگە كونتراباندالاۋ ءۇشىن اۋلاعانىن حابارلاعان ەدى. ولاردان 40-تان استام قۇس، بەس اتىس قارۋى، 200-گە جۋىق ءوق-دارى، سۋىق جانە لاقتىراتىن قارۋلار، سونداي-اق قۇستاردى ۇستاۋعا جانە تاسىمالداۋعا ارنالعان جابدىقتار الىنعان. الدىن الا ەسەپتەۋلەر بويىنشا، مەملەكەتكە كەلتىرىلگەن زالال 120 ميلليون تەڭگەدەن اسقان.