قاراعاندىدا سوت ۇيىندە 35 جىرتقىش قۇستى، ونىڭ ىشىندە سيرەك كەزدەسەتىن تۇرلەردى زاڭسىز ساتىپ الىپ، ۇستاعان ەر ادامعا ۇكىم شىعاردى، دەپ حابارلايدى infohub.kz سايتى.
ءىستى قازىبەك بي اۋداندىق سوتى قارادى. ايىپتالۋشىعا قازاقستان قىلمىستىق كودەكسىنىڭ 339-بابىنىڭ 1-بولىگى — جانۋارلار مەن قۇستاردىڭ سيرەك كەزدەسەتىن تۇرلەرىن زاڭسىز ساتىپ الۋ جانە ساقتاۋ بابى بويىنشا ايىپ تاعىلدى.
سوت انىقتاعانداي، 2017 جىلى ەر ادام Instagram-دا tanat.falcons دەگەن پاراقشا اشىپ، وندا قۇس سالۋ ارقىلى ۇلتتىق اڭشىلىق تۋرالى ماتەريالدار جاريالاپ، ولاردى ۇستاۋ، كۇتۋ جانە ەمدەۋ تاجىريبەسىمەن بولىسكەن.
2017 جىلدان 2026 جىلدىڭ 5 اقپانىنا دەيىن ول ءتيىستى رۇقساتسىز بەلگىسىز ساتۋشىلاردان سيرەك كەزدەسەتىن قۇستاردى ساتىپ العان. بارلىعى ايىپتالۋشىدان 35 قۇس تاركىلەندى.
ساراپشىلاردىڭ قورىتىندىسى بويىنشا، ولاردىڭ ىشىندە 31 بالوبان، ءبىر لاشىن، ەكى بۇركىت جانە ءبىر قارشىعا بولعان.
سوتتا ەر ادام كىناسىن تولىق مويىنداپ، وكىنگەنىن ءبىلدىردى.
پروكۋرور ايىپتالۋشىعا ءبىر جىل باس بوستاندىعىن شەكتەۋ جانە ءۇش جىلعا سيرەك كەزدەسەتىن جانۋارلار مەن قۇستارعا قاتىستى قىزمەتپەن اينالىسۋعا تىيىم سالۋدى سۇرادى. ەر ادامنىڭ ءوزى جانە ونىڭ ادۆوكاتى امنيستيا قولدانۋدى ءوتىندى.
سوت جەڭىلدەتەتىن ءمان-جايلار رەتىندە كىنانى تولىق مويىنداۋدى، شىنايى وكىنۋدى، سونداي-اق ءتورت كامەلەتكە تولماعان بالانىڭ اسىراۋىندا بولۋىن ەسكەردى. اۋىرلاتاتىن ءمان-جايلار انىقتالعان جوق.
«ەر ادامعا ءبىر جىل التى اي باس بوستاندىعىن شەكتەۋ جازاسى تاعايىندالىپ، ءبىر جىلعا سيرەك كەزدەسەتىن جانە جويىلىپ بارا جاتقان جانۋارلار تۇرلەرىنە قاتىستى قىزمەتپەن اينالىسۋ قۇقىعىنان ايىرىلدى. سونىمەن قاتار، „قازاقستان رەسپۋبليكاسىنىڭ جاڭا كونستيتۋسياسىنىڭ قابىلدانۋىنا بايلانىستى امنيستيا تۋرالى“ زاڭىنىڭ نەگىزىندە ەر ادام باس بوستاندىعىن شەكتەۋ تۇرىندەگى نەگىزگى جازادان بوساتىلدى»، — دەپ حابارلادى سوتتا.
ۇكىم ءالى زاڭدى كۇشىنە ەنگەن جوق.
بۇعان دەيىن ەر ادامنان تاركىلەنگەن قۇستار ۋاقىتشا قاراعاندى حايۋاناتتار باعىندا ۇستالىپ، سوت ۇكىمى زاڭدى كۇشىنە ەنگەننەن كەيىن تابيعي مەكەندەيتىن ورتاعا جىبەرىلەتىنى حابارلانعان بولاتىن.