قاراعاندى وبلىسىندا «Vavada» ينتەرنەت-كازينوسى ويىنشىلارىنىڭ اقشاسىن قابىلداپ، شىعارىپ وتىرعان دروپوۆودتار توبىنىڭ قىزمەتى توقتاتىلدى. بۇل تۋرالى infohub.kz سايتى حابارلايدى.
قارجىلىق مونيتورينگ اگەنتتىگىنىڭ مالىمەتىنشە، وپەراسيانى پروكۋراتۋرانىڭ ۇيلەستىرۋىمەن قارجىلىق مونيتورينگ اگەنتتىگىنىڭ قاراعاندى وبلىسى بويىنشا دەپارتامەنتى جۇرگىزگەن.
«تەرگەۋ دەرەكتەرى بويىنشا، 2026 جىلدىڭ قاڭتارىندا سحەما ۇيىمداستىرۋشىلارى ينتەرنەت-كازينو وكىلدەرىمەن قازاقستان اۋماعىندا اقشا قابىلداۋ جانە شىعارۋ تۋرالى كەلىسىمگە كەلگەن. كەيىننەن توپقا قاتىسۋشىلاردىڭ ءبىرى توپتىڭ قىزمەتىن ۇيلەستىرىپ، كازينو وكىلدەرىمەن بايلانىسىپ وتىرسا، ەكىنشىسى دروپپەرلەردى ىزدەۋمەن، ولاردىڭ بانك شوتتارىنا قولجەتىمدىلىكتى قامتاماسىز ەتۋمەن جانە وپەراتورلاردى ىرىكتەۋمەن اينالىسقان»، — دەلىنگەن قارجىلىق مونيتورينگ اگەنتتىگىنىڭ رەسمي Telegram-ارناسىندا.
ۆەدومستۆونىڭ مالىمدەۋىنشە، قاراعاندىدا جالعا الىنعان كەڭسەدە وپەراتورلار تاۋلىك بويى اۋىسىممەن جۇمىس ىستەگەن.
قارجىلىق مونيتورينگ اگەنتتىگىنىڭ اقپاراتى بويىنشا، سحەمادا بارلىعى 23 دروپ-شوت پايدالانىلىپ، ولار ارقىلى 415 ملن تەڭگەدەن استام سوماعا وپەراسيالار جۇرگىزىلگەن.
ەكى كۇدىكتىگە قاتىستى ءۇيقاماق تۇرىندەگى بۇلتارتپاۋ شاراسى قولدانىلدى.
سوتتىڭ سانكسياسىمەن ولاردىڭ مۇلكىنە، ونىڭ ىشىندە جەكە ۇيگە، ەكى جەر تەلىمىنە جانە Mercedes-Benz كولىگىنە تۇتقىن سالىندى.
قىلمىستىق ءىس سوتقا جىبەرىلدى. ق ر قپك-نىڭ 201-بابىنا سايكەس وزگە اقپارات جاريالاۋعا جاتپايدى.