قاراعاندى وبلىسىندا جۇمىسسىزداردى قىسقا مەرزىمدى كاسىپتىك وقىتۋ باعدارلاماسى باستالدى. وعان سايكەس 250 ادام جاڭا ماماندىق الادى. بيىل وبلىستا بارلىعى 481 تۇرعىندى وقىتۋ جوسپارلانعان، دەپ حابارلايدى infohub.kz سايتى.
وقىتۋ ءبىلىم بەرۋ مەكەمەلەرى مەن وقۋ ورتالىقتارىندا ۇيىمداستىرىلعان. ماماندىقتار ءتىزىمى: اسپاز، شاشتاراز، تىگىنشى، تىگىنشى-كيىم ۇلگىسىن جاساۋشى، سلەسار-جوندەۋشى، بۋحگالتەر-كاسسير، جيناۋشى، ەلەكتروگازبەن دانەكەرلەۋشى، 1س وپەراتورى، باعدارلاماشى، مانيكيۋر شەبەرى جانە ت.ب. ماماندىقتار ءتىزىمى جۇمىس بەرۋشىلەردىڭ وتىنىمدەرى نەگىزىندە جاساقتالعان.
ەڭ كوپ سۇرانىسقا يە بولعان كۋرستار – مانيكيۋر شەبەرى جانە شاشتاراز. ودان كەيىن اسپازدار، سودان سوڭ ۆەب-ماستەرلەر مەن ۆەب-ديزاينەرلەر. پوليگرافيالىق جابدىقتى رەتتەۋشى جانە كىتاپ تۇپتەۋشى ماماندىقتارىن يگەرگىسى كەلەتىندەر ەڭ از.
كۋرستاردىڭ ۇزاقتىعى بىلىكتىلىك كۇردەلىلىگىنە قاراي 3 ايدان 6 ايعا دەيىن. قاتىسۋشىلارعا اي سايىن 32 681 تەڭگە كولەمىندە شاكىرتاقى، جول جۇرۋگە 4 اەك (14 768 تەڭگە)، تۇرۋعا 10 اەك (36 920 تەڭگە) وتەماقى تولەنەدى. مەديسينالىق تەكسەرۋدى مەملەكەت 2 اەك (7 384 تەڭگە) مولشەرىندە تولەيدى.
وقۋ اياقتالعاننان كەيىن باعدارلاماعا قاتىسۋشىلاردىڭ ءارقايسىسى تۇراقتى جۇمىس ورنىنا ورنالاستىرىلادى. قىسقا مەرزىمدى كۋرستارعا وتىنىمدەردى قابىلداۋ قاراعاندى وبلىسىنىڭ قالالارى مەن اۋداندارىنداعى مانساپ ورتالىقتارىندا جالعاسۋدا.