قاراعاندى – سۇرىپتاۋ – اقادىر تەمىرجول بولىگىندە قامىس ورتەنىپ، ءورتتى تولىق سوندىرۋگە شامامەن التى ساعات قاجەت بولدى، دەپ حابارلايدى infohub.kz سايتى.
قتج-نىڭ مالىمەتىنشە، ءوتىپ بارا جاتقان پويىزدىڭ ءماشينيسى ءورتتى ساعات 14:15-تە بايقاپ، دەرەۋ قاراعاندى – سۇرىپتاۋ ستانسياسىنىڭ كەزەكشىسىنە حابارلاعان. ءورت وشاعى تەمىرجول توسەمىنەن التى مەتر جەردە بولعان، ءورت اۋماعى 0،7 گا قۇرادى.
وقيعا ورنىنا قاراعاندى ستانسياسىنىڭ ءورت ءسوندىرۋ پويىزى مەن ءوڭىردىڭ تجد قىزمەتكەرلەرى جىبەرىلدى. سوندىرۋگە 25 ادام مەن بەس بىرلىك ارنايى تەحنيكا قاتىستى. ءورتتى سوندىرۋگە 90 توننا سۋ جۇمسالدى.
ساعات 17:04-تە ءورت وقشاۋلانىپ، 19:58-دە تولىق ءسوندىرىلدى.
«ءورت پويىزداردىڭ قوزعالىسىنا اسەر ەتپەدى. كىدىرىستەر تىركەلگەن جوق، زارداپ شەككەندەر جوق. تەمىرجول ينفراقۇرىلىمى، جولدار، سيگنال بەرۋ، بايلانىس جانە ەلەكترمەن جابدىقتاۋ جۇيەلەرى دە زاقىمدانبادى»، — دەپ حابارلادى قتج-دا.
ءورت ءسوندىرۋ پويىزدارى تەمىرجولدا تاۋلىك بويى كەزەكشىلىك ەتىپ، ءورت شىققان جاعدايدا جەدەل جەتۋگە دايىن، دەپ اتاپ ءوتتى كومپانيادا.
الدىڭعى كۇنى سولتۇستىك قازاقستان جانە قاراعاندى وبلىستارىنداعى تابيعي ورتتەردى سوندىرۋگە پويىزدار جۇمىلدىرىلعان بولاتىن. قۇرعاق ءشوپ پەن بۇتالاردىڭ ءورتى تەمىرجول جولدارىنا تىم جاقىنداپ، پويىزدار قوزعالىسىنا ءقاۋىپ ءتوندىردى.