قاراعاندى وبلىسىندا 13 جاستاعى ءجاسوسپىرىم ءتورت جاسار بالانىڭ ءومىرىن ساقتاپ، ەرلىك جاسادى. وقيعا تامىز ايىنىڭ باسىندا بۇقار جىراۋ اۋدانىنداعى سەمىزبۇعا كولىندە بولعان، دەپ حابارلايدى infohub.kz سايتى.
Polisia.kz مالىمەتىنشە، بالا ۇرلەمەلى ماتراستا ءجۇزىپ جۇرگەن كەزدە قاتتى جەل ونى اۋدارىپ، كىشكەنتاي بالا سۋعا ءتۇسىپ كەتكەن. جاقىن جەردە بولعان توعىزىنشى سىنىپ وقۋشىسى نۇرالى ءالحان ساسىپ قالماي، دەرەۋ كومەككە ۇمتىلىپ، بالانى سۋدان شىعارىپ العان.
ءجاسوسپىرىمنىڭ بۇل ارەكەتى الەۋمەتتىك جەلىلەردە تاراعان سوڭ بەلگىلى بولدى. قاراعاندى وبلىسى پوليسيا دەپارتامەنتىنىڭ باستىعى نەگمەت يسماعۇلوۆ نۇرالىنى اناسىمەن بىرگە قابىلداپ، جەكە ءوزى العىسىن ءبىلدىردى. «مەن نۇرالىنىڭ ارەكەتى تۋرالى الەۋمەتتىك جەلىلەردەن ءبىلىپ، ونىڭ باتىلدىعىنا شىن جۇرەكتەن ءتانتى بولدىم. سىن ساعاتتا ول ساسىپ قالماي، ءوز ءومىرىن قاتەرگە تىگىپ، كىشكەنتاي بالانىڭ ءومىرىن ساقتاپ قالدى. مۇنداي ارەكەت قۇرمەتكە لايىق. بالانىڭ باتىل ءارى مەيىرىمدى بولىپ وسكەنى ءۇشىن اتا-اناسىنا جەكە العىس ايتقىم كەلەدى»، — دەدى پوليسيا باستىعى.
نەگمەت يسماعۇلوۆ ريزاشىلىق بەلگىسى رەتىندە ءجاسوسپىرىمنىڭ اناسى سامال ءابدىراحمانوۆاعا العىس حات تابىس ەتتى. ايەل التى بالا تاربيەلەپ وتىر. «انا رەتىندە مەن بالام ءۇشىن قاتتى ۋايىمدادىم. ونىڭ بالانى قۇتقارۋعا ۇمتىلعانىن بىلگەندە، ول ءۇشىن قورىقتىم. ءبىراق بالانىڭ امان قالعانىن بىلگەن سوڭ، ۇلكەن ماقتانىش سەزىمى پايدا بولدى. پوليسيا دەپارتامەنتىنىڭ باسشىلىعىنا بالامنىڭ ارەكەتىن اتاپ وتكەندەرى ءۇشىن العىس ايتامىن»، — دەدى سامال ءابدىراحمانوۆا.
نۇرالىدىڭ ءوزى سول ساتتە ىقتيمال سالدارى مەن ماراپات تۋرالى ويلاماعانىن ايتادى. ونىڭ ايتۋىنشا، ول جاي عانا بالانىڭ قاۋىپتە ەكەنىن كورىپ، كومەكتەسۋدى شەشكەن. «ءبارى كۇتپەگەن جەردەن بولدى. الدىمەن بالا ۇرلەمەلى ماتراستا ءجۇزىپ ءجۇردى، سودان كەيىن جەلدىڭ سالدارىنان ماتراس اۋدارىلىپ، ول سۋعا ءتۇستى. مەن دەرەۋ ونى قۇتقارۋعا ۇمتىلدىم. مەنىڭ بەس ءاعا-ىنىم مەن قارىنداسىم بار، سوندىقتان سول ساتتە ونىڭ ورنىنا ءوز تۋىستارىمدى ەلەستەتتىم. مەن جاي عانا بالانىڭ ءتىرى قالعانىن قالادىم. ەشقانداي ماراپات تۋرالى ويلاعان جوقپىن»، — دەدى نۇرالى.
كورسەتكەن باتىلدىعى مەن ەرلىگى ءۇشىن نۇرالى ءالحانعا پوليسيا دەپارتامەنتىنىڭ باستىعى قازاقستان رەسپۋبليكاسى ىشكى ىستەر مينيسترلىگىنىڭ ءرامىزى بار قول ساعاتىن تابىس ەتتى. ونىڭ اعا-ىنىلەرى مەن قارىنداستارىنا دا سىيلىقتار بەرىلدى. نەگمەت يسماعۇلوۆ جاس باتىرعا وقۋدا تابىس، مىقتى دەنساۋلىق جانە جارقىن بولاشاق تىلەپ، ونىڭ باتىلدىعى، جاناشىرلىعى مەن جاۋاپكەرشىلىك سەزىمى بولاشاقتا دا لايىقتى ىستەرگە نەگىز بولاتىنىنا سەنىم ءبىلدىردى.