قازاقستاندىق كاراتەشى نۇرقانات اجىكانوۆ جاپونيادا ءوتىپ جاتقان ازيا ويىندارى-2026-دا 75 كەلىگە دەيىنگى سالماقتا ءۇشىنشى ورىنعا كوتەرىلدى. قولا جۇلدە ءۇشىن بەلدەسۋدە ول فيليپپيندىك الۆين باتيچاندى 10:1 ەسەبىمەن جەڭىپ، قارسىلاسىنا مۇمكىندىك قالدىرمادى، دەپ حابارلايدى infohub.kz سايتى.
25 جاستاعى سپورتشىنىڭ جۇلدەگە بارار جولى ساتسىزدىكتەن باستالدى: شيرەك فينالدا اجىكانوۆ يراندىق مورتەزا نەماتيگە 0:8 ەسەبىمەن جول بەردى. الايدا قارسىلاسى كەيىن فينالعا شىعىپ، قازاقستاندىققا جۇبانىش تورىنا جول اشىپ، قولا ءۇشىن كۇرەسۋگە مۇمكىندىك بەردى.
ءۇشىنشى ورىن ءۇشىن شەشۋشى بەلدەسۋدە اجىكانوۆ باتيچانمەن كەزدەسىپ، ايقاستى سەنىمدى تۇردە جەڭىسپەن اياقتادى – 10:1.
قازاقستاندىق كاراتەشى ءۇشىن بۇل ازيا ويىندارىنداعى العاشقى تابىس ەمەس: 2023 جىلى حانچجوۋدا ول 75 كەلىگە دەيىنگى سالماقتا چەمپيون اتانعان. ونىڭ قورجىنىندا 2021 جىلعى الەم چەمپيوناتىنىڭ ەكى قولا مەدالى بار – جەكە جانە كوماندالىق كۋميتەدە. سونىمەن قاتار اجىكانوۆ ازيانىڭ ءۇش دۇركىن چەمپيونى: 2021 جىلى كوماندالىق كۋميتەدە جەڭىسكە جەتسە، 2023 جانە 2025 جىلدارى 75 كەلىگە دەيىنگى سالماقتا ۇزدىك شىقتى.
وسى تابىستىڭ ارقاسىندا قازاقستان قۇراماسىنىڭ قورجىنىندا ەندى 11 مەدال بار: بەس التىن، ءبىر كۇمىس جانە بەس قولا.
ويىنداردىڭ رەسمي اشىلۋى 19 قىركۇيەكتە ءوتتى. 45 ەلدىڭ سپورتشىلارى قاتىساتىن كەشەندى جارىستا 460 مەدال جيىنتىعى ساراپقا سالىنادى: 217ء-سى – ەرلەر اراسىندا، 204ء-ى – ايەلدەر اراسىندا جانە 39-ى – ارالاس رازريادتاردا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. چەمپيون اتانعاندار: ۆەلوشاباندوزدار ريناتا سۇلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. سول كۇنى قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين سالدى.
جارىستىڭ ەكىنشى كۇنىنەن كەيىن قازاقستان بەيرەسمي كوماندالىق ەسەپتە ءتورتىنشى ورىندا تۇر.