قاسكەلەڭدەگى پەرزەنتحانادا شالا تۋعان ۇشەم سابيلەر قايتىس بولدى. مارقۇم نارەستەلەردىڭ تۋىستارى كىنالىلەردى جاۋاپقا تارتۋدى تالاپ ەتىپ وتىر، دەپ حابارلايدى infohub.kz.
28 جاستاعى ايەل جۇكتىلىكتىڭ التىنشى ايىندا ءۇش ۇل تۋعان. تۋىستاردىڭ ايتۋىنشا، ەكى ءسابي تۋعاننان كەيىن بىردەن كوز جۇمسا، ءۇشىنشىسىنىڭ ءولىمى تۋرالى اكەسى كەزدەيسوق بىلگەن. قايعىدان قان جۇتقان اتا-انا ەندى ۇلىنىڭ دەنەسىن بەرۋدى سۇراپ، مۇقيات تەرگەۋ جۇرگىزۋدى تالاپ ەتىپ وتىر.
تۋىستار بوسانۋشىعا كەسار تىلىگىن ۇسىنعانىن، الايدا دارىگەرلەر تابيعي بوسانۋعا ماجبۇرلەگەنىن ايتادى. «بىزگە كەسار تىلىگى جاسالۋى كەرەك دەدى. ءبىراق نەگە ەكەنىن بىلمەيمىز، ايدانانى ءوز بەتىمەن بوسانۋعا ماجبۇرلەدى. تاڭەرتەڭ ونىڭ ءوزى كۇيەۋىنە ەكى بالانىڭ ولگەنىن جازدى. ال ءۇشىنشىسىن دارىگەرلەر بولىمشەدە دەدى. ءبىز ەكى نارەستەنى جەرلەۋگە كەتتىك. كەيىن ءۇشىنشىسىنىڭ دە قايتىس بولعانىن بىلدىك. نەگە دارىگەرلەر بۇل تۋرالى بىزدەن جاسىردى؟» — دەدى تۋىس جازيرا تۇلەشوۆا.
ولار سونداي-اق بالالاردىڭ ءولىم سەبەبىن ايتپاعانىن مالىمدەيدى. «بىزگە ەشقانداي قۇجاتسىز ەكى بالانى جاشىككە سالىپ بەردى. مەنىڭ وزىمە تۇسكى ساعات ەكىنىڭ جارىمىندا ەكى نارەستەنى قوراپقا سالىپ ۇستاتتى. ءبىز مۇنىڭ ءبارى قالاي بولعانىن، بالالارىمىزدى قالاي جوعالتقانىمىزدى بىلگىمىز كەلەدى. نە بولدى؟ ءبىز ەكسگۋماسيا جاساپ، ءۇش بالانىڭ دا دنق-سىن راستاۋدى تالاپ ەتەمىز»، — دەدى تۋىس ەرجان ەكەيبايەۆ.
دارىگەرلەر وزدەرىنىڭ حاتتاما بويىنشا ارەكەت ەتكەنىن ايتادى. ولاردىڭ ايتۋىنشا، بوسانۋشى شۇعىل تۇردە اۋرۋحاناعا جات قىزىلعان. ءۇش نارەستە توتەنشە تومەن سالماقپەن دۇنيەگە كەلگەن — ولاردىڭ مۇشەلەرى تولىق جەتىلمەگەن. «25 اپتالىق مەرزىمدەگى ۇشەممەن بوسانۋ — اسا اۋىر جاعداي جانە شۇعىل گوسپيتاليزاسيانى تالاپ ەتەدى. تۋعان كەزدە سالماعى 500 گرامنان از بولسا، بۇل توتەنشە تومەن سالماق سانالادى، بۇل كەزدە ومىرلىك ماڭىزدى مۇشەلەر، اسىرەسە وكپە مەن ورتالىق جۇيكە جۇيەسى ءالى تولىق قالىپتاسپاعان»، — دەلىنگەن قاراساي اۋداندىق كلينيكالىق كوپسالالى ورتالىق اۋرۋحاناسىنىڭ ءباسپاسوز قىزمەتىنىڭ حابارلاماسىندا.
ەندى قايعىعا باتقان اتا-انا ءۇشىنشى بالانىڭ دەنەسىن بەرۋدى كۇتىپ وتىر. تۋىستار پوليسياعا ارىزدانعان — ولار اپاتقا كىنالىلەردىڭ جازالانۋىن قالايدى.