قاسكەلەڭدەگى پەرزەنتحانادا ۇشەم نارەستەلەردىڭ ولىمىنەن كەيىن وتباسى دارىگەرلەردىڭ ارەكەتىن تەكسەرۋدى تالاپ ەتىپ، پوليسياعا ارىزداندى. مەديكتەر حاتتاماعا سايكەس ارەكەت ەتكەندەرىن ايتادى، دەپ حابارلايدى infohub.kz سايتى.
28 جاستاعى ايدانا ورازباەۆا جۇكتىلىكتىڭ التىنشى ايىندا ءۇش ۇل تۋعان. ەكى بالانىڭ ءولىمى تۋرالى وعان دەرەۋ حابارلاندى. كەيىن وتباسى ءۇشىنشى نارەستەنىڭ دە قايتىس بولعانىن ءبىلدى. ايەل ءۇشىن بۇل ءۇشىنشى جۇكتىلىك ەدى، ول كۇيەۋىمەن بىرگە ەكى بالا تاربيەلەپ وتىر. سوڭعى ايىندا ول اۋرۋحانادا ساقتاۋدا جاتقان. بوسانۋ كۇنى ول ۇيگە از ۋاقىتقا سۇرانىپ كەتكەن، سودان كەيىن سۋى كەتكەن.
ايداناعا كەسار تىلىگىن ۇسىندى، الايدا بوسانۋ تابيعي جولمەن قابىلداندى. تۋىسى جازيرا تولەشوۆا: «بىزگە كەسار جاسالۋى كەرەك ەدى دەدى. ءبىراق نەگە ەكەنىنە ايدانانى بوساندىرىپ تاستادى. تاڭەرتەڭ ول كۇيەۋىنە ەكى بالا ءولدى دەپ ءوزى جازدى. ال ءۇشىنشىسى، دارىگەرلەردىڭ ايتۋىنشا، بولىمشەدە جاتىر. ءبىز ەكى ءسابيدى جەرلەۋگە كەتتىك. كەيىن ءۇشىنشىسى دە ولگەنىن بىلدىك. نەگە دارىگەرلەر بىزدەن جاسىردى؟» – دەدى.
جاقىندارىنىڭ ايتۋىنشا، ولارعا تەك ەكى نارەستەنىڭ دەنەسى بەرىلگەن، ءولىم سەبەپتەرى بەلگىسىز. ءقازىر ولار ءۇشىنشى بالانىڭ دەنەسىن الۋدى كۇتىپ وتىر. وتباسى پوليسياعا ارىزبەن جۇگىنىپ، بارلىق بالالارعا سوت-مەديسينالىق ساراپتاما مەن دنك زەرتتەۋ جۇرگىزۋدى تالاپ ەتەدى.
اۋرۋحانادا ايەلدى شۇعىل تۇردە گوسپيتاليزاسيالاعانىن، ال ءۇش نارەستەنىڭ بارلىعى 25 اپتالىق مەرزىمدە دەنە سالماعى وتە تومەن – 500 گراممنان از بولىپ تۋىلعانىن مالىمدەدى. مەديكتەردىڭ ايتۋىنشا، مۇنداي مەرزىمدە وكپە مەن ورتالىق جۇيكە جۇيەسىن قوسا العاندا، ومىرلىك ماڭىزدى ورگاندار تولىق قالىپتاسپاعان. مەكەمەدە دارىگەرلەر حاتتاماعا قاتاڭ سايكەس ارەكەت ەتكەنىن اتاپ ءوتتى. نارەستەلەردىڭ ءولىمىنىڭ ناقتى سەبەبىن سوت-مەديسينالىق ساراپتاما انىقتايدى.
بۇعان دەيىن الماتى وبلىسىندا جاڭا تۋعان نارەستە بىرنەشە كۇننەن كەيىن قايتىس بولعان. اۋرۋحانادا تەكسەرۋ باستالدى.