Kaspi.kz ديرەكتورلار كەڭەسى اكسيونەرلەرگە ءبىر اكسياعا 1 مىڭ تەڭگە كولەمىندە ديۆيدەند تولەۋدى بەكىتۋدى ۇسىندى، بۇل جالپى سوماسى 199،5 ميلليارد تەڭگەنى قۇراۋى مۇمكىن، دەپ حابارلايدى infohub.kz سايتى.
كومپانيا 9 قىركۇيەككە جوسپارلانعان اكسيونەرلەر جينالىسىن وتكىزەتىنىن مالىمدەدى. كۇن تارتىبىنە جاي اكسيالار بويىنشا پايدانى ءبولۋ ماسەلەسى ەنگىزىلگەن.
ديرەكتورلار كەڭەسى ءبىر جاي اكسياعا 1 مىڭ تەڭگە كولەمىندە ديۆيدەند بەكىتۋدى ۇسىندى. Kaspi.kz ورنالاستىرىلعان اكسيالارىنىڭ سانى 199،5 ميلليوندى قۇرايتىنىن ەسكەرسەك، تولەمدەردىڭ جالپى كولەمى 199،5 ميلليارد تەڭگەگە جەتۋى مۇمكىن.
اكسيونەرلەر ءتىزىمىنىڭ تىركەلۋ كۇنى الدىن الا 2026 جىلعى 8 قىركۇيەككە بەلگىلەنگەن. الايدا ديۆيدەندتەر قانداي كەزەڭ ءۇشىن تولەنەتىنى ناقتىلانباعان.
ايتا كەتەيىك، 2025 جىلدىڭ قورىتىندىسى بويىنشا فينتەح-كومپانيانىڭ تازا پايداسى 1 تريلليون تەڭگەنى قۇرادى.
Kaspi.kz قۇرامىنا Kaspi Bank، تۇرىك ماركەتپلەيسى Hepsiburada، Kaspi ماركەتپلەيسى، Kaspi Pay، Kaspi Travel ج ش س جانە Kaspi Office ج ش س كىرەدى. Kaspi.kz اكسيالارى مەن جاھاندىق دەپوزيتارلىق قولحاتتارى NASDAQ، KASE جانە AIX بيرجالارىندا ساتىلادى.
Kaspi.kz ءىرى اكسيونەرلەرى ميحايل لومتادزە (23،04%)، ۆياچەسلاۆ كيم (20،06%) جانە Baring قورلارى (19%) بولىپ تابىلادى.
ەسكە سالايىق، ماۋسىم ايىندا Kaspi.kz ءبىرىنشى توقسانداعى ديۆيدەندتەردى ءبىر اكسياعا 850 تەڭگە كولەمىندە، جالپى سوماسى 161،5 ميلليارد تەڭگە تولەيتىنىن حابارلاعان بولاتىن.