ماڭعىستاۋ وبلىسىندا كاسپي تەڭىزىنىڭ اكۆاتورياسىندا اۋقىمدى ىزدەستىرۋ-قۇتقارۋ وپەراسياسى تاۋلىك بويى ۇزدىكسىز جۇرگىزىلۋدە — اۋا رايىنىڭ كەنەتتەن ناشارلاۋىنان كەيىن حابار-وشارسىز كەتكەن ەكى اسكەري قىزمەتشى ىزدەستىرىلۋدە، دەپ حابارلايدى infohub.kz سايتى.
قورعانىس مينيسترلىگىنىڭ رەسمي Telegram-ارناسىندا ءمالىم ەتكەندەي، جۇمىستار قازاقستان رەسپۋبليكاسى پرەمەر-مينيسترىنىڭ ورىنباسارى قانات بوزىمبايەۆ باسقاراتىن ۇكىمەتتىك كوميسسيانىڭ تاپسىرماسىمەن اتقارىلۋدا.
ىزدەستىرۋ-قۇتقارۋ جۇمىستارىن جەدەل باسقارۋدى قورعانىس ءمينيسترى، اۆياسيا گەنەرال-لەيتەنانتى داۋرەن قوسانوۆ جۇزەگە اسىرۋدا. قۇرىلعان جەدەل شتابتىڭ قۇرامىنا قورعانىس مينيسترلىگىنىڭ، ۇقك شەكارا قىزمەتىنىڭ، توتەنشە جاعدايلار مينيسترلىگىنىڭ، ىشكى ىستەر مينيسترلىگىنىڭ، سونداي-اق ماڭعىستاۋ وبلىسىنىڭ جەرگىلىكتى اتقارۋشى ورگاندارىنىڭ وكىلدەرى كىردى.
«اۋقىمدى ىزدەستىرۋ-قۇتقارۋ وپەراسياسىنا 252 ادام جەكە قۇرام، 34 بىرلىك ارنايى جەرۇستى تەحنيكاسى، 37 اسكەري سۇڭگۋىر، 14 كەمە مەن قايىق، سونداي-اق 4 تىكۇشاقتى قوسا العاندا 20-دان استام اۋە كەمەسى جۇمىلدىرىلدى. ۆەدومستۆولاردىڭ كۇشتەرى مەن قۇرالدارىمەن سۋ اكۆاتورياسىن، جاعالاۋ ايماعىن جانە ىرگەلەس اۋماقتاردى اۋەدەن ۇزدىكسىز پاترۋلدەۋ مەن تەكسەرۋ جۇرگىزىلۋدە»، — دەدى قورعانىس مينيسترلىگىندە.
وقيعا فاكتىسى بويىنشا قىلمىستىق ءىس قوزعالىپ، ارنايى كوميسسيا بولعان جاعدايدىڭ بارلىق سەبەپتەرى مەن ءمان-جايلارىن انىقتاۋ ءۇشىن تەرگەۋ شارالارىن جۇرگىزۋدە.
قازا تاپقانداردىڭ وتباسىلارىنا جانە زارداپ شەككەن اسكەري قىزمەتشىلەرگە قاجەتتى ماتەريالدىق جانە پسيحولوگيالىق كومەك كورسەتىلەدى.
ەسكە سالايىق، وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كەنەتتەن جانە كۇرت ناشارلاۋى مەن ەكپىندى جەلدەن 17 اسكەري قىزمەتشى اشىق تەڭىزگە اعىزىلىپ كەتكەن بولاتىن. جەدەل قابىلدانعان شارالاردىڭ ناتيجەسىندە ءۇش اسكەري قىزمەتشى قۇتقارىلىپ، ەكەۋىن ىزدەۋ جالعاسۋدا. وكىنىشكە قاراي، 12 اسكەري قىزمەتشى قازا تاپتى. بۇگىن قازاقستاندا جالپىۇلتتىق ازا تۇتۋ كۇنى.