كاسپي تەڭىزىندەگى وقۋ-جاتتىعۋ كەزىندە ماڭعىستاۋ وبلىسىندا قازا تاپقان ساربازداردىڭ قىزمەت ەتۋىنە نەبارى 8 كۇن قالعان — ۇيگە بيلەتتەرى ساتىپ الىنعان بولاتىن. بۇل تۋرالى اسكەري-تەڭىز كۇشتەرى باس قولباسشىسىنىڭ ورىنباسارى ارمان ساتقانوۆ ايتتى، دەپ حابارلايدى infohub.kz سايتى.
ونىڭ ايتۋىنشا، قازا تاپقاندار اسكەري-تەڭىز بازاسىنىڭ تەڭىز جاياۋ اسكەرىنىڭ دەسانتتىق-شابۋىلداۋ باتالونى قۇرامىندا قىزمەت ەتىپ، جاقسى ناتيجە كورسەتكەن. تراگەديا الدىندا اسكەريلەر ەكى رەت جاتتىعۋ وتكىزگەن، ولاردىڭ بارلىعى ءتۇسىرۋ ءتارتىبىن بىلگەن.
«جىگىتتەر اسكەري-تەڭىز بازاسىنىڭ تەڭىز جاياۋ اسكەرىنىڭ دەسانتتىق-شابۋىلداۋ باتالونى قۇرامىندا جاقسى قىزمەت ەتتى. بۇعان دەيىن ەكى جاتتىعۋ وتكىزىلدى، جىگىتتەر ءتۇسىرۋ تۋرالى ءبارىن ءبىلدى. بۇل بۇكىل قازاقستان بويىنشا وتكەن ءىرى قورىتىندى ستراتەگيالىق كوماندالىق-شتابتىق وقۋ-جاتتىعۋلار ەدى. ەپيزودتاردىڭ ءبىرى — تەڭىز دەسانتىن جاعاعا ءتۇسىرۋ. ءبىراق ءتۇسىرۋ كۇنى تولقىن كوتەرىلىپ، ولاردى ءتۇسىرۋ كەزىندە باسىپ قالدى»، — دەپ كەلتىرەدى ارمان ساتقانوۆتىڭ ءسوزىن «موي گورود» باسىلىمى.
اسكەري-تەڭىز كۇشتەرى باس قولباسشىسىنىڭ ورىنباسارى وقيعاعا قاتىسى بارلاردىڭ بارلىعى ءقازىر جاۋاپ بەرىپ جاتقانىن قوستى. مينيسترلىك تاراپىنان قازا تاپقانداردىڭ تۋىستارىنا پسيحولوگيالىق جانە قارجىلىق كومەك كورسەتىلۋدە.
ەسكە سالايىق، 24 قىركۇيەكتە وقۋ-جاۋىنگەرلىك تاپسىرمانى ورىنداۋ كەزىندە اۋا رايىنىڭ كەنەتتەن جانە كۇرت ناشارلاۋى مەن ەكپىندى جەلدەن كاسپي تەڭىزىنە 17 اسكەري قىزمەتشىنى الىپ كەتتى. ولاردىڭ ون ءتورتى قازا تاپتى.
ءۇش اسكەري قۇتقارىلدى، بىرەۋى اۋرۋحاناعا جات قىزىلدى. كەشە وبلىستىق دەنساۋلىق ساقتاۋ باسقارماسى پاسيەنت ماڭعىستاۋ وبلىستىق كوپبەيىندى اۋرۋحاناسىنا جەتكىزىلگەنىن، ونىڭ جاعدايى تۇراقتى اۋىر دەپ باعالانعانىن حابارلادى.
امان قالعانداردىڭ اراسىندا اتىراۋ وبلىسىنىڭ 19 جاستاعى بەكەت قۋاندىق بار.