ماڭعىستاۋ وبلىسىنىڭ ءتۇپقاراعان اۋدانىندا توتەنشە جاعدايلار مينيسترلىگىنىڭ قىزمەتكەرلەرى كاسپي تەڭىزىنىڭ جاعالاۋىندا قۇتقارۋ وپەراسياسىن جۇرگىزدى. اۋا رايىنىڭ كۇرت ناشارلاۋىنان ادامدار مىنگەن ۇرلەمەلى قايىق جاعادان الىستاپ كەتتى، دەپ حابارلايدى infohub.kz سايتى.
وقيعا وتكەن ءتۇنى بولدى. رەزينالى قايىقتا ءۇش ادام بولعان. كۇشتى ەكپىندى جەل ولاردىڭ جاعاعا جەتۋ جولىن كەسىپ، قايىقتى اشىق تەڭىزگە الىپ كەتتى. جوعالعانداردى ىزدەۋگە قۇتقارۋ بولىمشەلەرى دەرەۋ اتتاندى.
ۆەدومستۆو قىزمەتكەرلەرى اعىزىلعان قايىقتى جەدەل تاۋىپ، بارلىق جولاۋشىلاردى امان-ەسەن جاعاعا جەتكىزدى. قۇتقارىلعاندار مەديسينالىق كومەككە مۇقتاج بولمادى. ماماندار ازاماتتارعا سۋداعى قاۋىپسىزدىك ەرەجەلەرىن ساقتاۋ قاجەتتىگىن تاعى دا ەسكە سالدى. جەل كۇشەيگەن كەزدە تەڭىزگە شىعۋعا قاتاڭ تىيىم سالىنادى.
ەسكە سالايىق، 24 قىركۇيەكتە اسكەري-تەڭىز كۇشتەرىنىڭ وقۋ-جاتتىعۋى كەزىندە كاسپي تەڭىزىنىڭ جاعالاۋىندا اۋا رايى ناشارلاپ، جەل كۇشەيدى. سونىڭ سالدارىنان اسكەري قىزمەتشىلەر توبى تەڭىزگە اعىزىلدى. ماڭعىستاۋ وبلىسى اكىمدىگىنىڭ ناقتىلانعان دەرەكتەرى بويىنشا، سۋعا 17 ادام تۇسكەن. ولاردىڭ 14ء-ى قازا تاپتى. وقيعا ورنىندا ۆيسە-پرەمەر قانات بوزىمبايەۆ باستاعان ۇكىمەتتىك كوميسسيا جۇمىس ىستەۋدە. ول ىزدەۋ جۇمىستارىن تاۋلىك بويى جۇرگىزۋدى جانە قازا تاپقانداردىڭ وتباسىلارىنا قاجەتتى كومەك كورسەتۋدى تاپسىردى. وقيعانىڭ سەبەپتەرى مەن ءمان-جايى قىلمىستىق ءىس اياسىندا انىقتالۋدا.
پرەزيدەنت قاسىم-جومارت توقايەۆ 25 قىركۇيەكتى قازا تاپقان اسكەري قىزمەتشىلەردى ەسكە الۋ كۇنى — جالپىۇلتتىق ازا تۇتۋ كۇنى دەپ جاريالاعان بولاتىن.