ماڭعىستاۋ وبلىسىندا اسكەري قىزمەتشىلەردىڭ ءومىرىن جالماعان توتەنشە وقيعانىڭ سەبەپتەرىن تەرگەۋ جانە سالدارىن جويۋ ماسەلەلەرىنە ارنالعان ۇكىمەتتىك كوميسسيانىڭ كەزەكتى وتىرىسى اقتاۋدا ءوتتى. قازاقستان رەسپۋبليكاسى ىشكى ىستەر ءمينيسترىنىڭ ورىنباسارى سانجار ءادىلوۆ كوميسسيا ءتوراعاسى قانات بوزىمباەۆقا سوتقا دەيىنگى تەرگەۋ بارىسى تۋرالى باياندادى، دەپ حابارلايدى infohub.kz سايتى.
سانجار ءادىلوۆتىڭ ايتۋىنشا، قىلمىستىق ءىس اياسىندا كۇدىكتىلەر مارتەبەسى پروسەستىك تۇرعىدان تىركەلىپ، اقتاۋ قالاسىنىڭ ۋاقىتشا ۇستاۋ يزولياتورىنا بەس لاۋازىمدى تۇلعا قامالدى: شتاب باستىعى — قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى، ەكى اسكەري ءبولىم كومانديرى، تەڭىز جاياۋ اسكەرى روتاسىنىڭ كومانديرى جانە كاتەر كومانديرى.
«تەرگەۋ جانە پروسەستىك ءىس-شارالار تولىق كولەمدە جالعاسۋدا، قاجەتتى ساراپتامالار جۇرگىزىلۋدە. تەرگەۋ بارىسىندا بارلىق قاتىسى بار ادامداردىڭ ارەكەتتەرىنە قاتاڭ قۇقىقتىق باعا بەرىلىپ، كۇدىكتىلەردىڭ تولىق شەڭبەرى تۇپكىلىكتى انىقتالاتىن بولادى»، — دەدى ىشكى ىستەر ءمينيسترىنىڭ ورىنباسارى.
قانات بوزىمبايەۆ زاڭمەن كەپىلدەندىرىلگەن تولەمدەردىڭ كىدىرىسسىز جۇرگىزىلەتىنىن، ءار وتباسىنا تۇراقتى نىسانالى قولداۋ كورسەتۋ ءۇشىن جاۋاپتى ماماندار بەكىتىلەتىنىن اتاپ ءوتتى.
ول سونداي-اق قازاقستاندىقتاردىڭ ازاماتتىق باستاماسىنىڭ ارقاسىندا قاراجات جيناۋ اياقتالعانىن مالىمدەدى. قازا تاپقانداردىڭ وتباسىلارى مەن زارداپ شەككەندەرگە قور قاراجاتىن ءادىل ءبولۋ ءۇشىن قازاقستان حالىق كەڭەسىنىڭ مۇشەسى، ماڭعىستاۋ وبلىسى قوعامدىق كەڭەسىنىڭ ءتوراعاسى بەكمۇرات ءجۇسىپوۆ باسقاراتىن ارنايى كوميسسيا قۇرىلدى.
ەسكە سالايىق، 24 قىركۇيەكتە وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كەنەتتەن كۇرت ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەري قىزمەتشى اعىپ كەتىپ، ولاردىڭ 14ء-ى قازا تاپتى. ۇشەۋى قۇتقارىلدى.
قىلمىستىق ءىس قازاقستان رەسپۋبليكاسى قىلمىستىق كودەكسىنىڭ ەكى بابى بويىنشا قوزعالدى. قازىرگى تاڭدا قورعانىس مينيسترلىگىنىڭ جوعارى قولباسشىلىق قۇرامىنداعى بەس لاۋازىمدى تۇلعانىڭ ۇستالعانى بەلگىلى. بۇگىن قورعانىس ءمينيسترى كىنالىلەر زاڭنىڭ بارلىق قاتاڭدىعىمەن جازالاناتىنىن ۋادە ەتتى.