ماڭعىستاۋ وبلىسىنداعى وقۋ-جاتتىعۋ كەزىندە اسكەريلەردىڭ قازا تابۋىنا قاتىستى تەرگەۋ جالعاسىپ جاتىر. تەرگەۋ ناقتى تۇلعالارعا اۋىستى: قىزمەتكە نەمقۇرايلى قارادى دەپ كۇدىكتەلگەن لاۋازىمدى ادامدار انىقتالدى. بۇل تۋرالى infohub.kz سايتى حابارلايدى.
قازاقستان باس پروكۋراتۋراسى ءوزىنىڭ رەسمي Telegram-ارناسىندا حابارلاعانداي، ءىس بويىنشا وقيعا ورنى قارالىپ، 30-دان استام اسكەري جاۋاپقا تارتىلدى، قۇجاتتاما مەن بەينەماتەريالدار الىندى. سونىمەن قاتار 12 ساراپتاما تاعايىندالدى.
«قىزمەتكە نەمقۇرايلى قارادى دەپ كۇدىكتەلگەن، سونداي-اق مەتەوجاعدايدى ەسكەرە وتىرىپ، جەكە قۇرامنىڭ قاۋىپسىزدىگىن قامتاماسىز ەتۋ ءۇشىن باقىلاۋدى جانە قاجەتتى شارالاردى قولدانۋدى قامتاماسىز ەتپەگەن، قۇتقارۋ جۇمىستارىن ءتيىستى دەڭگەيدە ۇيىمداستىرماعان، سالدارىنان ادامداردىڭ قازا تابۋىنا اكەپ سوققان لاۋازىمدى ادامدار انىقتالدى»، — دەلىنگەن باس پروكۋراتۋرا مالىمدەمەسىندە.
ۆەدومستۆو تەرگەۋ بارلىق كۇدىكتىلەرگە تولىق قۇقىقتىق باعا بەرىپ، پروسەستىك شارالار قولداناتىنىن اتاپ ءوتتى.
ەسكە سالايىق، 24 قىركۇيەكتە وقۋ-جاۋىنگەرلىك مىندەتتى ورىنداۋ بارىسىندا مەتەورولوگيالىق جاعدايدىڭ كەنەتتەن جانە كۇرت ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەريدى اعىزىپ اكەتتى. ۇشەۋى قۇتقارىلدى، 12ء-سى قازا تاپتى، ەكەۋىن ىزدەۋ جالعاسۋدا. قازاقستان رەسپۋبليكاسى قىلمىستىق كودەكسىنىڭ ەكى بابى بويىنشا قىلمىستىق ءىس قوزعالدى.
بۇگىن قازاقستاندا — جالپىۇلتتىق ازا تۇتۋ كۇنى.