كاسپي تەڭىزىندە 14 اسكەري قىزمەتشى قازا تاپقان وقيعادان كەيىن قازاقستاندا بەس جوعارى شەندى اسكەري قىزمەتكەر ۇستالدى. ولاردىڭ قاتارىندا اسكەري-تەڭىز كۇشتەرى باس شتابىنىڭ باستىعى ءارى ءبىرىنشى ورىنباسارى، ەكى اسكەري ءبولىم كومانديرى، سونداي-اق تەڭىز جاياۋ اسكەرى روتاسىنىڭ جانە كەمە كومانديرى بار. ولار قىلمىستىق نەمقۇرايلىلىق جاسادى دەپ كۇدىككە ىلىنگەن، دەپ حابارلايدى infohub.kz سايتى.
بەيسەنبى كۇنى 17 اسكەري قىزمەتشى كەمەدەن ءتۇسىپ جاتقاندا تەڭىزگە اعىزىپ اكەتكەن. ولاردىڭ 14ء-ى قازا تاپتى، ۇشەۋى قۇتقارىلدى. رەسمي مالىمەت بويىنشا، وقيعا «مەتەورولوگيالىق جاعدايدىڭ كۇرت ناشارلاۋى مەن جەلدىڭ كۇشەيۋى سالدارىنان جاۋىنگەرلىك وقۋ-جاتتىعۋ مىندەتىن ورىنداۋ بارىسىندا» بولعان.
وقيعا اقتاۋ قالاسىنان شامامەن 43 شاقىرىم جەردە ورىن الدى. تەرگەۋ جۇرگىزۋ ءۇشىن ىشكى ىستەر مينيسترلىگىنىڭ كوميتەتى قۇرىلدى. ىشكى ىستەر ۆيسە-مينيسترى سانجار ءادىلوۆتىڭ ايتۋىنشا، قازا تاپقاندار بويىنشا سوتقا دەيىنگى تەرگەۋ جۇرگىزىلۋدە.
تەرگەۋ اسكەري وقۋ-جاتتىعۋدى ۇيىمداستىرۋ مەن وتكىزۋ كەزىندە قابىلدانعان شەشىمدەردى، قاۋىپسىزدىك تالاپتارىنىڭ ساقتالۋىن جانە اۋا رايى جاعدايىنىڭ ەسكەرىلۋىن، سونداي-اق كەمەنىڭ تەحنيكالىق سيپاتتامالارىن زەردەلەيدى.
قازاقستان قورعانىس مينيسترلىگىنىڭ مالىمەتىنشە، «كاسپي قورعانىسى – 2026» اسكەري وقۋ-جاتتىعۋىنا 500-دەن استام اسكەري قىزمەتشى، اسكەري كەمەلەر مەن جاعالاۋ بولىمشەلەرى قاتىسقان.