كاسپي تەڭىزىندەگى قايعىلى وقيعادان امان قالعان اسكەري قىزمەتشى نيكيتا ۋدالوۆتىڭ تۋىستارى رەسمي مالىمدەمە جاسادى. جاس جىگىت باسىنان وتكەندى ازىرگە جاريا تۇردە ايتۋعا دايىن ەمەس، دەپ حابارلايدى infohub.kz سايتى.
مالىمدەمە ءماتىنى نيكيتا ۋدالوۆتىڭ اعاسىنىڭ Instagram الەۋمەتتىك جەلىسىندەگى پاراقشاسىندا جاريالاندى. ۇندەۋدە تۋىستارى راستالماعان اقپاراتتىڭ تارالۋىن توقتاتۋدى سۇراپ، اسكەري قىزمەتشىنىڭ جۋرناليستەرمەن نەگە بايلانىسپايتىنىن ءتۇسىندىردى.
«نيكيتا ءوزىن ءوزى قۇتقارىپ قالدى. قايعىلى ساتتە ول باعدارلاي ءبىلىپ، جاعاعا جەتىپ، امان قالدى. ءقازىر كوپشىلىك ونىڭ بۇنى قالاي ىستەگەنىن جانە ناقتى نە بولعانىن سۇراپ جاتىر. ءبىراق ول ازىرگە بۇل تۋرالى ايتۋعا دايىن ەمەس. ءبىز بۇعان تۇسىنىستىكپەن قاراۋدى سۇرايمىز. ول ءبىر كۇندە ۇمىتىلمايتىن نارسەنى باسىنان وتكەردى. ءقازىر ول جاريالىلىقتى قالامايدى، سۇحبات بەرگىسى كەلمەيدى جانە ەگجەي-تەگجەيىن ايتۋعا دايىن ەمەس. ءبىز مۇنى قۇرمەتتەۋدى وتە سۇرايمىز»، — دەلىنگەن مالىمدەمەدە.
ەسكە سالايىق، 24 قىركۇيەكتە وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كەنەتتەن كۇرت ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەري قىزمەتشى اعىزىلىپ كەتتى. ولاردىڭ ون تورتەۋى قازا تاپتى.
بۇعان دەيىن مەملەكەت باسشىسى قاسىم-جومارت توقايەۆ نيكيتا ۋدالوۆ پەن امان قالعان تاعى ەكى اسكەري قىزمەتشىنى «ەرلىگى ءۇشىن» مەدالىمەن ماراپاتتاعان بولاتىن.
سونىمەن قاتار قازاقستاننىڭ قورعانىس ۆەدومستۆوسى باسشىلىعىندا كادرلىق وزگەرىستەر بولدى. داۋرەن قوسانوۆ قورعانىس ءمينيسترى قىزمەتىنەن بوساتىلدى. ونىڭ ورنىنا ايدوس مىرزاحمەتوۆ تاعايىندالدى.