ماڭعىستاۋ وبلىسىنداعى اسكەري وقۋ-جاتتىعۋ كەزىندە حابارسىز كەتكەن تاعى ەكى اسكەري قىزمەتشىنىڭ دەنەسى كاسپي تەڭىزىنەن تابىلدى. اقپاراتتى قورعانىس مينيسترلىگى راستادى، دەپ حابارلايدى infohub.kz سايتى.
ىزدەۋ-قۇتقارۋ جۇمىستارى ءتۇنى بويى توقتاعان جوق. وسىلايشا، وقيعا سالدارىنان قازا تاپقاندار سانى 14 ادامعا جەتتى. ىزدەۋ وپەراسياسى اياقتالدى.
«بۇگىن، 25 قىركۇيەكتە، ساعات 09:15 شاماسىندا ۇزدىكسىز ىزدەۋ-قۇتقارۋ جۇمىستارى بارىسىندا بۇرىن حابارسىز كەتكەن ەكى اسكەري قىزمەتشىنىڭ — سەرجانت گۋماروۆ مانسۇردىڭ جانە ماتروس تۇردىبەك ۇلى ميراستىڭ دەنەسى تابىلدى»، — دەلىنگەن حابارلامادا.
ماڭعىستاۋ وبلىسىندا كاسپي تەڭىزىندە قازا تاپقان اسكەري قىزمەتشىلەردىڭ وتباسىلارىنا كومەك جيناۋ ءۇشىن ءبىرىڭعاي وپەراتور ايقىندالدى. ول «ۇلتتىق رۋح» قوعامدىق بىرلەستىگى بولدى.
اكىمدىكتە تۇسىندىرگەندەي، ءبىرىڭعاي تەتىك قازا تاپقانداردىڭ وتباسىلارىنا كومەكتەسۋگە نيەت بىلدىرۋشىلەردىڭ كوپتىگىنە بايلانىستى جانە الاياقتىقتىڭ الدىن الۋ ءۇشىن قۇرىلدى. جينالعان قاراجات تەك اسكەري قىزمەتشىلەردىڭ وتباسىلارىنا جىبەرىلەدى، ونىڭ جۇمسالۋىن مەملەكەتتىك جانە قۇقىق قورعاۋ ورگاندارى باقىلايدى.
تۇرعىنداردى اقشانى جەكە كارتالارعا جانە بەلگىسىز شوتتارعا اۋدارماۋعا شاقىردى.
رەسمي دەرەكتەمەلەر:
«ۇلتتىق رۋح» قوعامدىق بىرلەستىگى
بسن: 090140013447
بانك: «Alatau City Bank» اق
بسك: TSESKZKA
جسك: KZ03998PTB0000488655
ۆاليۋتا: KZT
قايعىلى وقيعا 24 قىركۇيەكتە كاسپيدەگى اسكەري-تەڭىز كۇشتەرىنىڭ وقۋ-جاۋىنگەرلىك تاپسىرمالارىن ورىنداۋ كەزىندە بولدى. كەنەتتەن باستالعان داۋىل مەن ەكپىندى جەلدەن 17 اسكەري قىزمەتشى اشىق تەڭىزگە اعىزىلىپ كەتتى.
وقيعا سالدارىنان 12 ادام قازا تاپتى، ۇشەۋىن قۇتقارۋ مۇمكىن بولدى (بىرەۋى اۋرۋحاناعا جات قىزىلدى)، تاعى ەكەۋىن ىزدەۋ جالعاسۋدا.
توتەنشە جاعدايدىڭ سەبەپتەرىن انىقتاۋ ءۇشىن پرەمەر-مينيستر ورىنباسارى قانات بوزىمبايەۆ باسقاراتىن ۇكىمەتتىك كوميسسيا قۇرىلدى. نەمقۇرايلىلىق جانە كەمە جۇرگىزۋ ەرەجەلەرىن بۇزۋ باپتارى بويىنشا قوزعالعان قىلمىستىق ءىس باس پروكۋراتۋرانىڭ ەرەكشە باقىلاۋىندا.
ساربازداردىڭ قازا تابۋىنا بايلانىستى پرەزيدەنت قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
بۇعان دەيىن «كۋرسيۆ» كاسپي تەڭىزىندە اسكەري قىزمەتشىلەردى ىزدەۋ جالعاسىپ جاتقانىن جازعان. وپەراسياعا جۇزدەگەن ادام مەن ونداعان ارنايى تەحنيكا جۇمىلدىرىلدى.
باس پروكۋراتۋرا 30 اسكەري قىزمەتشىدەن جاۋاپ الىپ، كۇدىكتىلەر شەڭبەرىن انىقتاعانىن حابارلادى.