ماڭعىستاۋ وبلىسىنداعى وقۋ-جاتتىعۋ كەزىندەگى قايعىلى وقيعادان امان قالعان اسكەري قىزمەتشى وبلىستىق كوپبەيىندى اۋرۋحاناعا جەتكىزىلىپ، دارىگەرلەردىڭ تۇراقتى باقىلاۋىندا جاتىر. بۇل تۋرالى وڭىرلىك دەنساۋلىق ساقتاۋ باسقارماسى حابارلادى، دەپ جازادى infohub.kz سايتى.
«ناۋقاسقا قاجەتتى مەديسينالىق كومەكتىڭ بارلىعى تولىق كولەمدە كورسەتىلۋدە. اسكەري قىزمەتشىنىڭ جاعدايى قازىرگى تاڭدا اۋىر كۇيدە تۇراقتى دەپ باعالانىپ وتىر»، — دەلىنگەن باسقارما حابارلاماسىندا.
دارىگەرلەر ەمدەۋدى جالعاستىرىپ، ناۋقاستىڭ جاعدايىن قاداعالاپ وتىر. احۋال وبلىستىق دەنساۋلىق ساقتاۋ باسقارماسىنىڭ باقىلاۋىندا.
ەسكە سالايىق، 24 قىركۇيەكتە اسكەري-تەڭىز كۇشتەرىنىڭ اسكەري قىزمەتشىلەرى كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتىن ورىنداعان بولاتىن. قورعانىس مينيسترلىگىنىڭ دەرەگىنشە، اۋا رايى كۇرت ناشارلاپ، جەل كۇشەيگەن. تەڭىزگە 19 ادامدى اعىزىپ اكەتكەن. توعىز اسكەري قىزمەتشى قازا تاپتى، ۇشەۋىن امان الىپ قالۋعا مۇمكىندىك بولدى. قالعاندارىن ىزدەۋ جالعاسۋدا.
اسكەريلەردىڭ قازا بولۋىنا قاتىستى قىلمىستىق ءىس قوزعالدى، تەرگەۋ بارىسىن باس پروكۋراتۋرا ەرەكشە باقىلاۋعا الدى.
پرەزيدەنت قاسىم-جومارت توقايەۆ اسكەري قىزمەتشىلەردىڭ تۋعان-تۋىستارىنا كوڭىل ايتىپ، 25 قىركۇيەكتى جالپىۇلتتىق ازا تۇتۋ كۇنى دەپ جاريالادى.
بۇعان دەيىن «كۋرسيۆ» ۆيسە-پرەمەر قانات بوزىمبايەۆ باسقارعان ۇكىمەتتىك كوميسسيانىڭ ۆەدومستۆولار جۇمىسىن ۇيلەستىرۋ جانە قازا تاپقانداردىڭ وتباسىلارىنا كومەك كورسەتۋ ءۇشىن وڭىرگە كەلگەنىن حابارلاعان ەدى.