كاليفورنيانىڭ يرۆاين قالاسىندا ءوتىپ جاتقان پانامەريكا چەمپيوناتىندا امەريكالىق ءجۇزۋشى كەيت دۋگلاسس 50 مەترگە ەركىن جۇزۋدە الدىن الا كەزەڭدە الەمدىك رەكورد ورناتتى. بۇل تۋرالى infohub.kz حابارلادى.
نيۋ-يورك قالاسىنىڭ ماڭىنداعى پەلحەم قالاشىعىنان شىققان 24 جاستاعى سپورتشى اشىق باسسەيندەگى جارىستا 23،49 سەكۋند ناتيجە كورسەتتى. بۇل ونىڭ كوماندالاسى گرەچەن ۋولشتىڭ ماۋسىم ايىندا ريمدە وتكەن حالىقارالىق جارىستا ورناتقان 23،55 سەكۋندتىق رەكوردىنان جاقسى.
دۋگلاسس بۇل سپرينت تۇرىندە الەمدىك رەكوردتى ەكىنشى رەت جاڭارتىپ وتىر. ول العاش رەت 19 ماۋسىمدا يندياناپوليستە وتكەن TYR Pro Swim Series جارىسىندا 23،59 سەكۋندپەن رەكورد ورناتقان ەدى. توعىز كۇننەن كەيىن ۋولش بۇل كورسەتكىشتى جاقسارتتى.
دۋگلاسس — بەس دۇركىن وليمپيادا جۇلدەگەرى. ول 2024 جىلعى الەم چەمپيوناتىندا 50 مەترگە ەركىن جۇزۋدە كۇمىس مەدال العان، ءبىراق پاريج وليمپياداسىندا بۇل باعدارلاماعا قاتىسپاعان.
دۋگلاستان كەيىنگى جارىستا ۋولش 23،78 سەكۋند كورسەتىپ، ەكەۋى يرۆاينداعى باسەكەنىڭ سوڭعى كۇنىندەگى فينالعا ەكى ۇزدىك ناتيجەمەن شىقتى. بۇل اقش، اۆستراليا، كانادا، جاپونيا جانە جۇڭگو جۇزۋشىلەرى قاتىسقان جارىستا ورناتىلعان العاشقى جەكە الەمدىك رەكورد بولدى.