ميچيگان شتاتىنداعى بەس جاسار بالانىڭ گيپەرباريالىق وتتەگى كامەراسىندا بولعان ورتتەن قازا تابۋىنا بايلانىستى بۇرىنعى قاۋىپسىزدىك مەنەدجەرى 19 ايعا باس بوستاندىعىنان ايىرىلدى. بۇل تۋرالى infohub.kz سايتى حابارلايدى.
66 جاستاعى دجەففري موستەللەر وكلەند وكرۋگىنىڭ سوتىندا ءوز كىناسىن مويىنداماي، ابايسىزدا ادام ولىمىنە اكەپ سوققان ءىس بويىنشا ۇكىمدى تىڭدادى. ول وكسفورد ورتالىعىندا قاۋىپسىزدىك مەنەدجەرى بولىپ جۇمىس ىستەگەن. بۇل مەكەمە اۋتيزم، سدۆگ جانە اۋتويممۋندى اۋرۋلاردى قوسا العاندا، ءتۇرلى دەنساۋلىق پروبلەمالارى بار بالالاردى گيپەرباريالىق وتتەگى تەراپياسىمەن ەمدەيتىن بالاما مەديسينا ورتالىعى.
موستەللەرگە 15 جىلعا دەيىن باس بوستاندىعىنان ايىرۋ جازاسى ءقاۋىپ تونگەن ەدى، الايدا سوت ونى 19 ايعا قىسقارتتى. وقيعا 2025 جىلدىڭ قاڭتارىندا دەترويت قالاسىنىڭ ماڭىنداعى تروي قالاسىنداعى وكسفورد ورتالىعىندا بولعان. بەس جاسار توماس كۋپەر زەيىن تاپشىلىعى گيپەراكتيۆتىلىگىنىڭ بۇزىلۋى (سدۆگ) جانە ۇيقى اپنوەسىنا بايلانىستى ەم قابىلداپ جاتقان. كەنەتتەن كامەرا ىشىندە ءورت شىعىپ، جارىلىس بولعان. ساراپشىلاردىڭ ايتۋىنشا، بالا ماتراستاعى پاراقتى تارتىپ، ستاتيكالىق ەلەكتر ۇشقىنىن تۋدىرعان. وتتەگىگە قانىققان ورتادا بۇل ۇشقىن جالىنعا اينالىپ، بالا بىرنەشە سەكۋند ىشىندە قازا تاپقان. اناسى كامەرانى اشۋعا تىرىسىپ، قولى مەن كەۋدەسىن قاتتى كۇيدىرىپ العان.
موستەللەر توماستىڭ ولىمىنە بايلانىستى ايىپتالعان ءتورت بۇرىنعى قىزمەتكەردىڭ ءبىرى عانا. قالعان ۇشەۋىنىڭ ءىسى سوتتا قارالۋدا. ورتالىقتىڭ نەگىزىن قالاۋشى جانە باس ديرەكتورى تامەلا پەتەرسون ەكىنشى دارەجەلى كىسى ولتىرۋگە، نىسان مەنەدجەرى گاري ماركەن ەكىنشى دارەجەلى كىسى ولتىرۋگە جانە ابايسىزدا كىسى ولتىرۋگە، ال كامەرانى باسقارعان الەتا موففيت ابايسىزدا كىسى ولتىرۋگە جانە مەديسينالىق قۇجاتتارعا جالعان اقپارات ەنگىزۋگە ايىپتالعان.
اقش-تىڭ ازىق-ت ۇلىك جانە دارى-دارمەك باسقارماسى (FDA) گيپەرباريالىق كامەرالاردى كەيبىر اۋرۋلاردى ەمدەۋگە ءقاۋىپسىز ءارى ءتيىمدى دەپ تانىعانىمەن، بۇل تەراپيا قاۋىپسىزدىگىنە قاتىستى داۋلار ءورشىپ تۇر. ترامپ اكىمشىلىگىنىڭ دەنساۋلىق ساقتاۋ حاتشىسى روبەرت كەننەدي كىشىنىڭ جاقتاستارى HBOT-تى قولداسا، كوپتەگەن ساراپشىلار بۇل ءادىستىڭ مەديسينادا كەڭىنەن قولدانىلۋىنا كۇمانمەن قارايدى. توماستىڭ اتا-اناسى قايتىس بولعان ۇلى ءۇشىن كلينيكا مەن كامەرا وندىرۋشىسىنە قارسى 100 ميلليون دوللارلىق تالاپ قويعان.