اقتوبەلىك ايەل ۇلىنىڭ گرەسيادا 125 جىلعا باس بوستاندىعىنان ايىرىلعانىن حابارلادى. قازاقستان سىرتقى ىستەر مينيسترلىگى بۇل جاعدايعا قاتىستى پىكىر ءبىلدىردى، دەپ حابارلايدى infohub.kz.
Aktobe times باسىلىمىنىڭ مالىمەتىنشە، رەداكسياعا جەرگىلىكتى تۇرعىن نۇرحان قادىروۆا جۇگىنگەن. ول 24 جاستاعى ۇلى راشيد قاديروۆتىڭ تۇركياداعى جۇمىس تۋرالى حابارلاندىرۋعا جاۋاپ بەرگەنىن، ءبىراق سونىڭ ورنىنا ۇزاق مەرزىمگە تۇرمەگە قامالعانىن ايتتى.
«راشيد — مەنىڭ ورتانشى ۇلىم. ول زاتتارىن جيناپ، ەشكىمگە ەشتەڭە ايتپاي كەتتى. كەيىن ماعان ونىڭ جۇمىس ىستەۋ ءۇشىن تۇركياعا ۇشقانىن ايتتى. بۇل مەن ءۇشىن سوققى بولدى. كەيىن ول ءوزى بەيتانىس نومىردەن قوڭىراۋ شالىپ: "اناشىم، مەن تۇرمەدەمىن، گرەسيادامىن" دەدى. Instagram-دا جۇمىس تۋرالى حابارلاندىرۋدى كورگەنىن ايتتى. وعان ۇشاق بيلەتىن تولەپ، تۋريستەرگە ارنالعان موتورلى قايىقپەن سەرۋەندەۋگە بايلانىستى جۇمىس ۋادە ەتكەن. كەيىن زاڭسىز ميگرانتتاردى تاسىمالداۋ تۋرالى ەكەنى بەلگىلى بولدى. ول ءوزىنىڭ نەگە تارتىلعانىن تۇسىنبەدى»، — دەدى ايەل.
نۇرحان قادىروۆانىڭ ايتۋىنشا، ونىڭ ۇلى شەت ءتىلىن بىلمەيدى، جانىندا اۋدارماشى بولماعان. «وعان جاي عانا قۇجاتتارعا قول قويۋ كەرەكتىگىن ايتقان، ايتپەسە مەرزىم ودان ءارى ۇزارادى دەگەن. ءقازىر وعان 125 جىل باس بوستاندىعىنان ايىرۋ جازاسى جانە ايىپپۇل سالىندى، ول تەڭگەگە شاققاندا 1 ملرد تەڭگەنى قۇرايدى. ول وتە جاس، اقشا تاپقىسى كەلدى، ءبىراق وسىنداي قيىندىققا تاپ بولدى»، — دەپ قوستى ايەل.
NUR.KZ ءتىلشىسى ق ر سىرتقى ىستەر مينيسترلىگىنىڭ ءباسپاسوز قىزمەتىنە ساۋال جولدادى.
«قازاقستان رەسپۋبليكاسىنىڭ سىرتقى ىستەر مينيسترلىگى گرەسيادا جازاسىن وتەپ جاتقان قازاقستان ازاماتى تۋرالى بىلەدى. اتالعان ازامات گرەكتىك سوتتىڭ شەشىمىمەن ميگرانتتاردى زاڭسىز تاسىمالداۋ ءۇشىن جاۋاپكەرشىلىك كوزدەيتىن باپ بويىنشا سوتتالدى. جەرگىلىكتى زاڭناماعا سايكەس، بۇل ارەكەت اۋىر قىلمىستار ساناتىنا جاتادى. ءبىزدىڭ گرەسياداعى ديپلوماتتارىمىز ءوز قۇزىرەتى شەگىندە ازاماتقا قاجەتتى كونسۋلدىق-قۇقىقتىق كومەك كورسەتۋدە. ماسەلە باقىلاۋدا»، — دەلىنگەن جاۋاپتا.