اقمولا وبلىسىندا پوليسيا ءموبيلدى قوسىمشا ارقىلى بانك شوتىنان 2 ملن تەڭگە جىمقىرۋ تۋرالى قىلمىستىق ءىستى تەرگەپ جاتىر. وقيعا سەلينوگراد اۋدانىندا بولعان، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ مالىمەتىنشە، بيىلعى مامىر ايىندا جەرگىلىكتى تۇرعىن قاراوتكەل اۋىلىندا جەكە ءۇي قۇرىلىسىن باستاعان. جۇمىسشى ىزدەۋ كەزىندە تانىسقان ەر ادامدى ول جۇمىسقا جالداعان. بىرنەشە اي بويى جالدامالى جۇمىسشى نىساندا قۇرىلىس جانە جوندەۋ جۇمىستارىن ورىنداعان.
22 تامىزدا تاڭەرتەڭ زارداپ شەگۋشى ۇيالى تەلەفونىنىڭ جوعالعانىن بايقاعان. بانك قوسىمشاسىن تەكسەرگەندە، ول شوتىنان جالپى سوماسى 2 ميلليون تەڭگەگە بىرنەشە اۋدارىم جاسالعانىن كورگەن. اقشانى الۋشى ونىڭ جۇمىسشىسى بولىپ شىققان. الايدا، بەلگىلى بولعانداي، تانىسۋ كەزىندە ەر ادام ءوزىن بوتەن ەسىممەن تانىستىرعان.
شوت يەسى دەرەۋ پوليسياعا حابارلاعان. قىزمەتكەرلەر جەدەل-ىزدەستىرۋ ءىس-شارالارىن جۇرگىزىپ، ناتيجەسىندە قىسقا مەرزىمدە كۇدىكتىنىڭ جەكە باسىن انىقتاعان. قازىرگى ۋاقىتتا قىلمىستىق ءىس بويىنشا قاجەتتى جەدەل جانە تەرگەۋ ارەكەتتەرى جۇرگىزىلۋدە، وقيعانىڭ بارلىق ءمان-جايى انىقتالۋدا.