قازاقستاندا تامىز ايىنداعى ۇبت باستالدى، ول 14 تامىزعا دەيىن جالعاسادى. قاتىسۋعا 30 مىڭنان استام تالاپكەر ءوتىنىم بەردى، دەپ حابارلايدى infohub.kz سايتى.
عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنىڭ مالىمەتىنشە، 10 تامىزدا قازاقستاندا تامىز ايىنداعى ۇبت باستالىپ، 14 تامىزعا دەيىن جالعاسادى. تەستىلەۋگە 30 مىڭنان استام ءوتىنىم قابىلداندى. ۇبت تاپسىرۋشىلاردىڭ 65%-ى قازاق تىلىندە، 35%-ى ورىس تىلىندە، 100 ادام اعىلشىن تىلىندە تەست تاپسىرۋعا نيەت ءبىلدىردى. ۇبت-نىڭ العاشقى كۇنىندە 6،7 مىڭنان استام ادام تەست تاپسىرادى.
تامىز ايىنداعى ۇبت-عا اعىمداعى جانە وتكەن جىلدارداعى مەكتەپ پەن كوللەدج تۇلەكتەرى، قانداستار، شەتەلدە وقىعان ورتا ءبىلىم بەرۋ ۇيىمدارىنىڭ تۇلەكتەرى، شىعارماشىلىق ءبىلىم بەرۋ باعدارلامالارىنان باسقا دايىندىق باعىتتارىنا اۋىسقىسى كەلەتىن ستۋدەنتتەر، باسقا ءبىلىم بەرۋ باعدارلامالارىنان پەداگوگيكالىق باعىتتارعا اۋىساتىندار، سونداي-اق وتكەن وقۋ جىلىندا شەكتى بالل جيناي الماعان، اقىلى نەگىزدە جوعارى وقۋ ورىندارىنا قابىلدانعان ادامدار قاتىسادى.
سونىمەن قاتار، ءوز ماماندىعى بويىنشا جوعارى وقۋ ورنىندا اقىلى نەگىزدە وقۋدى جالعاستىرۋدى جوسپارلاپ وتىرعان كوللەدج تۇلەكتەرى اڭگىمەلەسۋ ناتيجەسى بويىنشا وقۋعا تۇسە الادى. بۇل جاعدايدا قابىلداۋدى جوعارى وقۋ ورىندارىنىڭ قابىلداۋ كوميسسيالارى جۇزەگە اسىرادى.