2026 جىلعى 13 قىركۇيەكتەن باستاپ قازاقستاندا بازالىق بانكتىك ليسەنزياسى بار بانكتەرگە اكتيۆتەر كولەمى مەن جەكە تۇلعالاردىڭ دەپوزيتتەرىنە قاتىستى شەكتەۋلەر كۇشىنە ەنەدى. ءتيىستى قاۋلىنى قارجى نارىعىن رەتتەۋ جانە دامىتۋ اگەنتتىگى قابىلدادى، دەپ حابارلايدى infohub.kz سايتى.
جاڭا ەرەجەلەرگە سايكەس، مۇنداي بانكتىڭ جيىنتىق اكتيۆتەرىنىڭ شەكتى كولەمى 500 ملرد تەڭگەدەن اسپاۋى ءتيىس. كورسەتكىش ءار ايدىڭ ەسەپتى كۇنىنە — ءتيىستى ايدىڭ سوڭعى جۇمىس كۇنىنە ەسەپتەلەتىن بولادى.
جەكە تۇلعالاردىڭ دەپوزيتتەرى ءۇشىن جەكە ليميتتەر بەلگىلەنگەن. ۇلتتىق ۆاليۋتاداعى جيناق سالىمىنىڭ مولشەرى 20 ملن تەڭگەدەن اسپاۋى كەرەك. بانك شوتتارىنداعى قاراجاتتى قوسا العاندا، تەڭگەمەن سالىناتىن باسقا دەپوزيتتەر ءۇشىن شەك 10 ملن تەڭگەنى قۇرايدى.
بانك شوتتارىنداعى اقشانى قوسا العاندا، شەتەل ۆاليۋتاسىنداعى دەپوزيتتەر بويىنشا ەڭ جوعارى مولشەر 5 ملن تەڭگە بولادى.
ەگەر ءبىر كليەنت بازالىق ليسەنزياسى بار بانككە دەپوزيتتەردىڭ بىرنەشە ءتۇرىن ورنالاستىرسا نەمەسە بىرنەشە بانكتىك شوت اشسا، بارلىق سالىمدار مەن شوتتار بويىنشا جيىنتىق كۇندەلىكتى قالدىق 20 ملن تەڭگەدەن اسپاۋى ءتيىس.
قارجى نارىعىن رەتتەۋ جانە دامىتۋ اگەنتتىگىندە بازالىق ليسەنزياسى بار بانكتەر وپەراسيالاردىڭ شەكتەۋلى تىزبەسى بار بانكتەردىڭ جاڭا ءتۇرى بولىپ تابىلاتىنىن ءتۇسىندىردى. بەلگىلەنگەن دەپوزيتتىك شەكتەۋلەر قولدانىستاعى بانكتەرگە قولدانىلمايدى، ويتكەنى ولار امبەباپ بانكتىك ليسەنزيا نەگىزىندە جۇمىس ىستەيدى.
ق ر قارجى نارىعىن رەتتەۋ جانە دامىتۋ اگەنتتىگى باسقارماسىنىڭ №124 قاۋلىسى 2026 جىلعى 13 قىركۇيەكتە كۇشىنە ەنەدى.
بۇعان دەيىن 1 تامىزداعى جاعداي بويىنشا قازاقستاندىق بانكتەردەگى حالىق پەن بيزنەستىڭ دەپوزيتتەرىنىڭ كولەمى 51،7 ترلن تەڭگەگە جەتكەنى حابارلانعان بولاتىن. جەكە تۇلعالاردىڭ سالىمدارى 30،5 ترلن تەڭگەنى قۇراسا، كومپانيالاردىڭ دەپوزيتتەرى 21 ترلن تەڭگەدەن استى. شىلدە قورىتىندىسى بويىنشا دەپوزيتتىك بازا Kaspi Bank، Forte Bank جانە Halyk Bank-تە بارىنشا ءوستى.